काठमाडौ, कार्तिक १५
सरकारले पर्यटन विकासका लागि एक सय ओटा नयाँ पर्यटकीय गन्तव्य बिहीवार सार्वजनिक गरेको छ । संस्कृति, पर्यटन तथा नागरिक उड्डयन मन्त्रालयले नेपाल पर्यटन बोर्ड, स्थानीय तथा प्रदेश सरकार र सरोकारवालाबाट सिफारिस भएको र आवेदन परेको गन्तव्यको आधारमा थप एक सय नयाँ गन्तव्य छनोट गरेको हो ।
नयाँ पर्यटकीय गन्तव्यका लागि देशैभरबाट परेका ६ सयभन्दा बढीको आवेदन तथा प्रदेश र स्थानीय सरकारले दिएको सुझाव र मन्त्रालयले गरेको अध्ययनको आधारमा नयाँ गन्तव्य छनोट गरिएको मन्त्रालयका सहसचिव घनश्याम उपाध्यायले जानकारी दिए ।
नयाँ गन्तव्य छनोटका लागि मन्त्रालयले ५ आधार तय गर्दै भदौमा सूचना प्रकासित गरेको थियो । नयाँ विकास गर्नु पर्ने गन्तव्यहरुमा चालु आर्थिक वर्षमा विनियोजित बजेटबाट बाँडफाँट गरिने मन्त्रालयले जानकारी दिएको छ ।
सय ओटा नयाँ गन्तव्यको पूर्वाधार लगायतका क्षेत्रको विकासका लागि ५० करोड रुपैयाँ बजेट विनियोजन गरिएको र प्रत्येक गन्तव्यलाई रू। ५० लाख रुपैयाँका दरले बजेट छ्ट्याइएको मन्त्रालयका सहसचिव तथा प्रवक्ता घनश्याम उपाध्यालले जानकारी दिए ।
सरकारले सार्वजनिक गरेको नयाँ पर्यटकीय गन्तव्यकोसूचीमा प्रदेश १ का १४ जिल्लालाई पनि समेटिएको छ । जसमा प्रदेशका ३० स्थान पर्यटकीय गन्तव्यको सूचीमा पर्न सफल भएका छन । सरकारले प्रदेश १ मा सवैभन्दा धेरै झापा र सुनसरीका ४,४ स्थानलाई पर्यटकीय गन्तब्यको सूचीमा राखेको छ । मोरङबाट भने सरकारको सूचीमा एउटा मात्र गन्तब्य स्थल परेको छ । धनपालगढी पर्यटकीय क्षेत्र, बेलबारी मात्र नयाँ तथा विकास गर्नुपर्ने गन्तब्यको सूचीमा परेको छ ।
यस्तो छ धनपालगढी
पर्यटकीय स्थल धनपालगढी बेलबारी –५ कसेनीमा रहेको छ । धनपाल राजाको दरबार रहेकाले धनपाल गढी भनिएको हो । धनपाल राजा, उनको दरबार र त्यसबेलको रहनसहनको बारेमा खोजी गर्ने कार्य जारी रहेको स्थानीय बताउँछन ।३५ बिघा क्षेत्रफलमा रहेको गढी पर्यटकीय सम्भावना बोकेको क्षेत्र हो । ७ वटा पोखरी रहेको उक्त क्षेत्रमा अहिले ३ वटा मात्र पोखरी रहेका छन । अन्य ४ वटा पोखरी भने जीर्ण अवस्थामा छन । वैशाखमा यहाँ ठुलो मेला लाग्ने गरे पनि संरक्षणको अभावमा यहाँका भौतिक संरचना बिग्रंँदै जान थालेका छन। धनपाल राजाको दरबार केही वर्ष अघिसम्म रहे पनि अहिले भग्नावशेषसमेत बाँकी छैन । सम्पदाहरू लोप हुदै जान थालेपछि अध्ययन अनुसन्धान गर्नेहरूले यो क्षेत्रलाई रोज्ने गरेका छन । विवाहपछि नवदम्पत्तिले मेलाको बेला यहाँ रहेको पोखरीको बीचमा गएर पूजाआजा गर्नुपर्ने स्थानीयको मान्यता छ ।
सरकारद्वारा सार्वजनिक नयाँ गन्तव्यहरुको सूचीहरुः
100-destinations11012018113957
