पोखरा, कात्तिक १६
पोखरामा जारी नमस्ते पोखरा प्रिमियर लिग अन्तर्गत आज भएको पहिलो खेलमा पोखरा पल्टनविरुद्ध सनसनीपूर्ण जित हात पार्दै धनगढी एक्सपट्र्स अंकतालिकामा शीर्ष स्थानमा पुगेको छ ।
धनगढीको जितमा अविस्मरणीय पारी खेलेका कप्तान दीपेन्द्रसिंह ऐरीले हारको संघारमा पुगेको धनगढीलाई ब्यूँताउने क्रममा ऐरीले २६ बलमा ४९ रन बनाए जसमा ४ छक्का र ४ चौका समावेश थिए ।
अन्तिम ओभरमा धनगढीलाई १४ रन आवश्यक थियो । स्ट्राइकमा थिए दीपेन्द्र । मेहबुब आलमले फ्याकेको पहिलो बल वाइड भयो । दोस्रो बलमा दीपेन्द्रको मिस हिट छक्कामा परिणत भयो । अन्तिम दुई बलमा चार रन चाहिँदा दीपेन्द्रले कभरतर्फ चौका प्रहार गर्दै टिमलाई दुई विकेटको जित दिलाए ।
आजको खेल हारेको भए उपाधि होडबाट लगभग बाहिरने अवस्थामा रहेको धनगढीका लागि यो जित निकै महत्वपूर्ण छ ।तर पनि प्लेअफमा पुग्नको लागि उसले अझै अन्य टिमहरुको नतिजा कुर्नुपर्ने छ ।
धनगढीका लागि पिटर टे्रगोले पनि विष्फोटक ब्याटिङ गर्दै अर्धशतकीय इनिङ खेलेका थिए । उनले ३४ बलको सामाना गर्दै ५ चौका र ४ छक्का प्रहार गरे । त्यस्तै, ओपनर शुभेन्दु पाण्डेले २२ रन बनाए ।
बलिङतर्फ पोखराका राशिद खानले ४ विकेट लिए । उनले ४ ओभरमा २४ रन खर्चेका थिए । त्यस्तै, विक्रम भुसाल र ललितनारायण राजवंशीले समान २–२ विकेट लिए ।
पोखरा रंगशालामा टस जितेर पहिले ब्याटिङ गरेको पोखरा पल्टनले निर्धारित २० ओभरमा ८ विकेटको क्षतिमा १४४ रन बनाएपछि धनगढीले मध्यम स्कोरको चुनौती पाएको थियो ।
पोखराको लागि रोहित कुमार पौडेलले इनिङ्स उकास्न खोजेका थिए । उनले २१ बलमा ३१ रन बनाए । पोखराका लागि रविन्द्र सिंहले २८, आशिफ शेखले २३, राशिद खानले अविजित १५ र कप्तान शरद भेषवाकरले १४ रन बनाए ।
४ रन हुदा पहिलो विकेटको रुपमा कुशल भुर्तेललाई गुमाएको पोखराले ४८ रन हुदा दोस्रो विकेटको रुपमा रविइन्दरलाई गुमाएको थियो । तेस्रो विकेटको रुपमा ४८ रन हुदा नै मेहबुब आलम शुन्य रनमा आउट भएपछि पोखरा दबाबमा आएको थियो ।
एक्स्पर्ट धनगढीका लागि कमलसिंह ऐरीले ४ विकेट लिए । जितसँगै धनगढीले आफ्नो ५ खेल खेल्दै शीर्ष स्थानमा उक्लिएको छ । यता, पोखराको पनि शीर्ष तीनमा पुग्ने सम्भावना कायमै रहेको छ ।
लिगको शीर्ष स्थानमा पुग्ने टिम फाइनलमा प्रवेश गर्ने छन् भने दोस्रो र तेस्रोले प्ले अफ खेल्नेछन् ।
