काठमाडौं,पुस ८
दोलखामा निर्माणाधीन ४ सय ५६ मेगावाटको माथिल्लो तामाकोसी जलविद्युत आयोजनाको लट–२ को बाँकी निर्माण लट–३ मा काम गरिरहेको एन्ड्रिज हाइड्रोलाई दिइने भएको छ । लट–२ (इलेक्ट्रो मेकानिकल) को ठेक्का लिएको भारतीय ठेकेदार टेक्सम्याको रेल एन्ड इन्जिनियरिङले समयमा काम नगरेपछि उपठेक्का गरेर अर्कोलाई दिन लागिएको हो ।
यही ठेकेदारले काम नगर्दा तामाकोसीको विद्युत उत्पादन अवधि लम्बिँदै गएको छ । आयोजना निर्माणको सुरुदेखि नै लट–२ को ठेकेदारले काममा ढिलाई गर्दै आएको छ । सुरुङभित्र लोअर पेनस्टक (तल्लो पेनस्टक) को सबै काम एन्ड्रिजलाई दिने सैद्धान्तिक सहमति भएको अप्पर तामाकोसी हाइड्रो पावर लिमिटेडका प्रमुख कार्यकारी अधिकृत विज्ञानप्रसाद श्रेष्ठले बताए ।
‘टेक्सम्याकोले पनि बाँकी काम अर्कोलाई दिने विषयमा सहमति जनाइसकेको छ, कसरी कुन दरमा गराउने भन्नेमा छलफल भइरहेको छ,’ उनले भने, ‘यसबाट आयोजनालाई थप आर्थिक भार पर्दैन । हामी आगामी पुस २३ गते ९जनवरी ७० भित्र कम्पनी, टेक्सम्याको र एन्ड्रिजबीच त्रिपक्षीय सम्झौता गरेर अघि बढ्छौं ।’ टेक्सम्याकोले नगरेको काम एन्ड्रिजलाई दिन ठेक्का नै तोड्न नपर्ने पनि श्रेष्ठले जानकारी दिए ।
उनका अनुसार ठेक्का सम्झौतामा यससम्बन्धी व्यवस्था छ । एन्ड्रिजले गर्ने कामको भुक्तानी टेक्सम्याकोको ठेक्का रकमबाट कट्टा हुनेछ । लट–२ अन्तर्गत बाँधको गेट निर्माण, भर्टिकल पेनस्टक साफ्ट (ठाडो सुरुङ) जडानलगायत काम पर्छ । यस लटमा पेनस्टकको सम्पूर्ण काममध्ये तल्लो पेनस्टकको हिस्सा करिब ७४ प्रतिशत हुन्छ । चार लटमा बाँडेर सुरु भएको निर्माणको अन्य काम करिब अन्तिम चरणमा छ । करिब ९७.८ प्रतिशत निर्माण पूरा हुँदा साढे ४३ अर्ब रुपैयाँ खर्च भएको छ ।
सुरुमा ब्याजबाहेक ३५ अर्ब २९ करोड रुपैयाँ लागत अनुमान गरिए पनि भूकम्प, नाकाबन्दी, ब्याज तथा अमेरिकी डलरमा आएको उतारचढावले लागत ब्याजसहित करिब ७० अर्ब रुपैयाँ पुग्ने प्रक्षेपण छ । आयोजना निर्माणमा अहिलेसम्म करिब ४३ अर्ब ५० करोड रुपैयाँ खर्च भइसकेको छ । आयोजनाले विद्युतगृह गोंगरदेखि खिम्तीसम्म ४७ किलोमिटर प्रसारण लाइन निर्माण गरिरहेको छ । चौथो लटको यो कामको निर्माणले गति लिएको छ ।(उर्जा खबरबाट)
