विराटनगर, पुस २८
सामुदायिक विकास समाज विराटनगरको २१ औं बार्षिक साधारणसभा शनिबार विराटनगरमा सम्पन्न भएको छ । साधारण सभाको अवसरमा जिल्ला समन्वय समिति मोरङका संयोजक नरेशप्रसाद पोखरेल,धनपालथान गांउपालिकाका प्रमुख हरीलाल सिंह र प्रमुख प्रशासकिय अधिकृत बाबुराम शर्मा लुइटेललाई सम्मान गरिएको छ ।
सामुदायिक विकास समाजका अध्यक्ष गंगाप्रसाद यादवले उनीहरुलाई दोसल्ला र फुलमालाले सम्मान गरेका थिए । कार्यक्रममा संयोजक पोखरेलले विभिन्न सामाजिक संघसंस्थाको सहयोग बिना सरकारको नयां नेपालको सपना साकार नहुने बताए ।
सो अवसरमा अध्यक्ष यादवले संस्थाले कृषि र पशु सहित प्राकृतिक सम्पदाको संरक्षण सम्बर्धनका साथै ग्रामिणक्षेत्रका जनताको सिप र नेतृत्व विकासका निम्ति काम गर्दै आएको बताए । संस्थाका सचिव विपुलेन्द्र झाले संस्थाले आर्थिक बर्ष २०७४–७५ मा ७२ लाख बराबरको सेवामुलक कार्य सम्पादन गरिएको जानकारी दिए । सो संस्थाले आफ्ना विभिन्न ५ वटा शाखा मार्फत झापा,मोरङ,सुनसरी,धनकुटा र तेह्रथुममा सेवामुलक गतिविधि संचालन गर्दै आएको छ ।
