एजेन्सी, चैत्र ५
चाम्पियन्स लिग प्रतियोगिताको अन्तिम १६ अन्तर्गत भएको स्पेनिस एथ्लेटिको मड्रिडविरुद्धको खेल दौरान गोलपछि रोनाल्डोले ‘खराब सेलिब्रेसन’ गरेर आफ्ना भ्रमणकारी समर्थकहरूको अपमान गरेको भन्दै एथ्लेटिकोले खेलको ३ दिनपछि अफिसियल रूपमा रोनाल्डोविरुद्ध उजुरी दर्ता गराएको हो । युभेन्टसलाई संकटपूर्ण अवस्थाबाट कमब्याक जित दिलाउन निर्णायक भूमिका खेलेका रोनाल्डोले खेल दौरान दोस्रो गोलपछि ‘दुई हात गोप्य अंगतर्फ लगेर अश्लील आशयको सेलिब्रेसन’ गरेका थिए ।
बुधबार युभेन्टसको घरमा भएको सो खेलमा युभेन्टसलाई शानदार जित दिलाउन रोनाल्डोले शानदार प्रदर्शन गर्दै सनसनीपूर्ण ह्याट्रिक गरेका थिए । पहिलो लेग २–० ले हारे पनि दोस्रो लेगमा युभेन्टसले ३–० को जित निकाल्दै अन्तिम आठमा स्थान बनाउँदा एथ्लेटिको भने प्रतियोगिताबाटै आउट भयो । एथ्लेटिकोले पोर्चुगिज फरवार्डविरुद्ध लीखित रूपमै छानबिन तथा कारबाही माग गर्दै उजुरी दर्ता गराएको हो ।
उनले त्यस्तै सेलिब्रेसन गरेका थिए, जस्तो अघिल्लो लेगमा एथ्लेटिको मड्रिडको घरमा युभेन्टसविरुद्ध एथ्लेटिकोले दोस्रो गोल गरेपछि टोलीका प्रशिक्षक डिएगो सिमोनीले गरेका थिए ।
तर, यी दुईमा फरक यो छ कि, सिमोनीले आफ्नै घरेलु दर्शकप्रति इंगित गर्दै त्यस्तो सेलिब्रेसन गरेका थिए भने रोनाल्डोले भने युभेन्टसको घरमा एथ्लेटिकोको पाहुना दर्शकतिर फर्किएर सो सेलिब्रेसन गरेका थिए । यसबाट पाहुना समर्थकको अपमान भएको एथ्लेटिकोले आफ्नो उजुरीमा दाबी गरेको छ ।
यदि युइएफएको छानबिनमा रोनाल्डो दोषी ठहर भए उनीमाथि कम्तीमा आगामी एक खेलदेखि बढीमा ३ खेलसम्म प्रतिबन्ध लाग्नेछ । यदि उनीमाथि खेल प्रतिबन्धको निर्णय नभए आर्थिक जरिमानाको फैसला हुनेछ ।
युइएफएले रोनाल्डोमाथि छानबिनको निर्णय अबको ३ दिनपछि मार्च २१ तारिखमा गर्ने जनाएको छ । रोनाल्डो अहिले राष्ट्रिय टोलीमा सहभागी हुन पोर्चुगल गएका छन् । यसअघि एथ्लेटिकोका प्रशिक्षक सिमोनीलाई पनि उस्तै सेलिब्रेसन गरेको विषयमा युइएफएले १७ हजार युरो रकम जरिमाना भराएको थियो । च्याम्पियन्स लिगको अन्तिम आठमा युभेन्टसले डच टिम आयाक्स प्रतिस्पर्धी पाएको छ । अब यदि रोनाल्डो प्रतिबन्धमा परे युभेन्टस महत्त्वपूर्ण चरणमा ठूलो संकटमा पर्ने खतरा बढेको छ ।
