८ असार, काठमाडौँ ।
नेपाल र बंगलादेशबीच जलविद्युत् र नवीकरणीय उर्जाको क्षेत्रमा लगानी गर्ने सम्बन्धमा सहमति भएको छ । आईतबार ऊर्जा, जलस्रोत तथा सिंचाई मन्त्रालयमा पत्रकार सम्मेलन गरी सहमतिबारे जानकारी गराईएको हो ।
यही असार ५ र ६ गते ब.गलादेशको कोक्सस् बजारमा सम्पन्न भएको दुईदेशका सचिवस्तरीय समितिहरुको दोश्रो बैठकले नेपाल र बंगलादेशबीच विद्युत् व्यापारको संभावना, नेपालमा जलविद्युत् विकासमा बंगलादेशी निजी प्रवद्र्धकबाट लगानीको संभावना, अन्तरदेशीय विद्युत् प्रसारण लाईनको संभावना, माथिल्लो कर्णाली जलविद्युत् आयोजनाबाट बंगालदेशले आयत गर्ने ५ सय मेगावाट विद्युत् तथा नेपाल र बंगलादेशबीचमा नविकरणीय ऊर्जाको क्षेत्रमा सहयोग गर्ने सम्बन्धी निर्णयहरु अनुमोदन गरेको हो ।
बैठकमा नेपालको तर्फबाट नेतृत्व गरेका ऊर्जा, जलस्रोत तथा सिंचाई सचिव दिनेश कुमार घिमिरेले नेपालको जलविद्युत्मा लगानी गरि निर्यात गर्ने तथा बैकल्पिक ऊर्जामा सहकार्य गर्ने सहमति भएको जानकारी दिए ।सहमतिमा तत्काल भारतको संरचना प्रयोग गर्ने र भविष्यमा बन्ने आयोजना भारतको भूमि हुदै बंगलादेशसम्म प्रशारण लाईन बनाउने सहमति भएको छ । यसमा भारतको पुर्ण समर्थन हुने विश्वास सचिव घिमिरेले व्यक्त गरे ।
२०७५ साउन २५ गते सम्पन्न नेपाल बंगलादेशबीच ऊर्जा क्षेत्रमा आपसी सहयोग सम्बन्धी समझदारी पत्रको दफा ४ मा व्यवस्था भए अनुसार सो सम्झौताको कार्यान्वयन पक्षलाई सहजीकरण र यस सम्बन्धमा हुने प्रगतीको अनुगनम गर्न सह सचिवस्तरीय एवं सचिवस्तरीय समितिहरु गठन गरिएको थियो ।
