एजेन्सी, असार १३
बलिउडको प्रतिष्ठित इन्टरनेशनल इन्डियन फिल्म एकेडेमी अवार्ड ‘आइफा’ को आगामी संस्करण नेपालमा आयोजना हुने भएको छ । आइफाको २० औँ संस्करणका सो अवार्ड समारोह काठमाडौँ महानगरपालिका सह–आयोजक रहने गरी हुन लागेको हो ।
अवार्ड समारोहबारे असार ८ गते बसेको मन्त्रिपरिषद्को बैठकले निर्णय गरेको हो । बिहीबार पत्रकार सम्मेलनमार्फत् सरकारका प्रवक्ता एवं सञ्चार तथा सूचना प्रविधि मन्त्री गोकुल बाँस्कोटाले मन्त्रीपरिषद्को निर्णयको बारेमा जानकारी दिँदै ‘आईफा अवार्ड’ काठमाडौंमा हुने बताए ।
नेपाल पर्यटन बोर्डले पर्यटन वर्ष २०२० लक्षित गरी अवार्ड समारोहको नेतृत्व लिएको जनाईएको छ । यस अवार्डमा ६ सयको आसपासमा पाहुनाहरुको उपस्थिति रहने सरकारको अनुमान छ । ६० भन्दा धेरै बलिउड कलाकारहरुको उपस्थिति रहने संस्कृति पर्यटन तथा नागरिक उडड्यन मन्त्रालयले जनाएको छ ।
अवार्ड आयोजना गर्न पर्यटन मन्त्री वा राज्यमन्त्री संयोजक रहने गरी एक उच्चस्तरीय समिति समेत बनाइएको छ । कार्यक्रम नेपाल आर्मीको मुख्यालय अगाडि रहेको मैदानमा गर्ने तय भएको छ ।
अवार्डको आयोजनासँगै सरकारले २० औं ‘आईफा अवार्ड’ का लागि ४४ करोड २५ लाख रुपैयाँसहित पाहुनाहरुको हवाई, खानपान तथा आवासको छुट्टै व्यवस्थापन गर्ने छ ।
यसअघि आईफाले आफ्नै नीजि खर्चमा अवार्ड आयोजना गर्दै आइरहेको थियो । हरेक संस्करण बाहिरी देशमा हुँदै आएको यो अवार्ड मलेशिया, सिंगापुर, अमेरिका, क्यानडा, श्रीलंकालगायतका देशमा भइसकेको छ ।
पहिलो पटक नेपालमा हुन लागेको ‘आईफा अवार्ड’ को कूल लागत १ अर्ब हुने प्रारम्भिक अनुमान छ । अभिनेता अभिताभ बच्चन ‘आईफा अवार्ड’ का ब्रान्ड एम्बेस्डर हुन् ।
