२५ असार, विराटनगर ।
दुईदिनदेखि लगातार परेको अविरल वर्षाका कारण विराटनगर महानगरपालिकाका विभिन्न ठाउँ डुबानग्रस्त बनेपछि महानगरपालिकाका मेयर भीम पराजुलीले माफी मागेका छन् । उनले बुधबार आफ्नो फेसबुकमार्फत विराटनगर निर्माणकै अवस्थामा रहेकाले नगरबासीमा केही असहजता र अप्ठ्यारो भएका भन्दै माफी मागेका हुन् ।
सोमबारदेखि परेको पानीका कारण विराटनगरमा सडक तथा नाला निर्माणको क्रम जारी रहेकोले अधिकांश स्थानमा डुबान हुनुका साथै सडकहरु हिलाम्मे बनेका छन् ।बजारका पसलहरुमा समेत पानी पसेको छ । पानीले विराटनगर महानगरपालिकाको उत्तरी क्षेत्र तीनपैनी,पोखरीयासहित दक्षिणीक्षेत्र रानीका अधिकांश टोल र सडकहरु जलमग्न भएका छन । दक्षिणी क्षेत्र रानीका विभिन्न टोलका बासिन्दाका घर आंगन र सडकहरुमा कयौं फिट पानी जमेका कारण सर्वसाधारणले सास्ती झेल्नु परेको छ ।
यसैबीच मेयर पराजुलीले वर्षाका कारण विभिन्न स्थानका नाला थुनिएपछि आफैँ उपस्थित भएर खुलाउन निर्देशन दिएका छन् । उनले माफी माग्दै सामाजिक संजाल फेसबुकमा लेखेका छन् ‘विराटनगर निर्माणको अवस्थामा भएको हुनाले ,केही असहजता र अफ्टठ्यारो स्थिति छ, यो समयमा भएको दुःखका लागि म सम्पुर्ण नगरबासीहरु संग क्षमा माग्न चाहान्छु । तपाईहरु सबैको सहयोगले यो दुःखको अवस्था लामो समय रहने छैन ।’
गएको २०७४ साल साउन २८ र २९ गते आएको बाढीका कारण केशलिया र सिंघीया खोला थुनिएर सहरमा पसेको बाढीले विराटनगरमा ठूलो क्षति पुगेको थियो । डुबानका कारण हजारौं सर्वसाधरण विस्थापित भएका थिए ।
