२६ असार, विराटनगर ।
आगामी साउन १ गतेदेखि ट्रक यातायात तथा ढुवानी ब्यवसायीहरुले सेवा ठप्प गर्ने चेतावनी दिएका छन् । सरकारले साउन महिनाबाट ढुवानी भाडामा भ्याट र भिसिटिएस सिस्टम लागू गर्ने भएपछि ब्यवसायी विरोधमा उत्रिएका हुन् ।
सरकारले आर्थिक बर्ष २०७६/७७ को बजेट भाषणबाट साउन १ गतेदेखि भेइकल एण्ड कन्साइन्मेन्ट ट्रेकिङ सिस्टम (भिसिटिएस) लागु गर्ने घोषणा गरिसकेको छ । सरकारले ल्याउन लागेको भ्याट र भिसिटिएस सिस्टम ब्यवहारिक नभएको भन्दै ब्यवसायीले विरोध जनाएका हुन् ।
सरकारले ल्याएको भिसिटिएस सिस्टम लागू भएपछि प्रत्येक ढुवानीकर्ताले आफुले लोड अनलोड गर्ने सामानको विवरण भरेर राजश्व अनुसन्धान विभागले दिने युजर प्यान कोड सहित अनलाईन फारम भर्नुपर्ने हुन्छ । ढुवानी सेवामा आबद्ध मजदुर र चालकहरु सामान्य लेखपढ गर्न मात्र जान्ने भएकाले बिल, बिल्टी, चालकको लाइसेन्स र मालसामान सहितको सम्पुर्ण विवरण अनलाईन मार्फत भर्न समस्या हुने उनीहरुको तर्क छ ।
विराटनगर ट्रक ब्यवसायी संघका अध्यक्ष मेघराज सिग्देलले सरकारले सरोकारवालासंग आवश्यक परामर्श र छलफल नगरि अव्यवहारिक नियम लागू गर्न खोजेपछि ब्यवसायी सेवा ठप्प गर्न बाध्य भएको जानकारी दिए । अध्यक्ष सिग्देलले ढुवानी सेवा अधिकांश रुपमा स्वरोजगार मुलक पेशाको रुपमा संचालनमा रहेको बताउँदै ब्यवसाय गरेवापत ट्रक ब्यवसायीले टिडिएस बुझाउँदै आएको बताए ।
एउटा ट्रक धनीले सम्पूर्ण कर र ट्याक्ससहित बार्षिकरुपमा २ लाख ३९ हजार बुझाउदै आएको उनको दाबी छ । प्रदेश १ मा पाँचसय बढी ढुवानी ब्यवसायी छन भने ५ हजार बढी ट्रक संचालनमा रहेको जनाइएको छ ।
