३० असार, विराटनगर ।
बस्ती पसेको बाढीको पानीले निकास नपाउदा कटहरी गांउपालिकास्थित सुकुम्बासी बस्तीका बासिन्दाले सास्ती झेल्नु परेको छ । लामो समयसम्म पानीले निकास नपाएका कारण उनिहरुको घर भत्किदै गएको छ भने उनिहरुमा स्वास्थ्यय समस्या समेत देखिएको छ । कटहरी गांउपालिका वडानम्बर ४ मा रहेको सुकुम्बासी बस्तीमा गएको बिहीबार बाढीको पानी प्रवेश गरेको थियो । ५ दिन अघि पसेको पानीले निकास नपाएर गांउमै जमेपछि त्यहाँका बासिन्दाले विभिन्न प्रकारका समस्या झेल्नुपरेको छ ।
पानी पसेको यत्तिका दिन बितिसक्दा समेत निकासको पहल नगरिरएका कारण आफ्नो माटोले बनाइएको कच्ची घर भत्किएको स्थानिय रामईकबाल लाल दासले गुनासो गरे । लामो समयसम्म पानी जमेका कारण टाटी मक्किएर कामै नलाग्नेगरि घर भत्किएको उनले बताए । गांउभरि पानी जमेका कारण दास जस्तै सो गांउका १ सय ३ घरपरिवार बाढीको पानीबाट पीडित भएका छन् । सोहि ठांउकी ४५ बर्षिय हिरादेवी कामतले आँगनमा ३ फिट पानी जमेका कारण असहज भएको बताइन् । उनले घरभित्र पसेको पानी निस्किएपछि घरकोठामा बाक्लोगरि माटोको हिलो जमेका कारण सुत्न बस्न योग्य नरहेको बताइन् ।
लामो समयसम्म घरआँगनमा पानी जमेर बसेका कारण स्थानीयलाई पिउने पानीको समेत समस्या भएको छ । बाढीको पानीका कारण पानीका ट्वीवेलहरुको पानी प्रदुषित भएको र त्यस्तो पानी सेवन गरेका कारण बस्तीका कयौं बालबालिका र महिलाहरु बिरामी भएका छन् । सो टोलमा ग्राभेल सडक निर्माण गरिएपनि नाला निर्माण नगरिएका कारण बस्तीका बासिन्दा प्रत्येकबर्ष सोहि प्रकारको पीडा खेप्दै आएका छन् । बस्तीकै दक्षिणतर्फ रहेको लोहन्द्रा खोलाको बाढी प्राय प्रत्येकबर्ष गांउ पस्दै आएको छ । कटहरी गांउपालिकाको वडानम्बर ४ मा रहेका १३७० घरमध्ये ३ सय बढी घरपरिवार बाढीले प्रभावित भएको गांउपालिकाको कार्यालयले जनाएको छ ।
