३१ असार, काठमाडौँ ।
नेपाली फिल्मका निर्माता छविराज ओझा र अभिनेत्री शिल्पा पोखरेलबीचको झगडा झन् दन्किँदै गएको छ ।केही दिन अगाडि शिल्पाले आफूमाथि घरेलु हिंसा भएको भन्दै प्रहरी परिसरमा छविविरुद्ध उजुरी हालेपछि विवाद बढेको यो जोडिको झगडा मिल्ने छाँटकाँट देखिएको छैन । छविले शिल्पासँग फेरी झगडा नगर्ने बाचा गरेपनि शिल्पा मान्न तयार देखिएकी छैनन् । ५५ वर्षका छवि र २५ वर्षकी शिल्पाको तीन वर्ष लामो बैबाहिक सम्बन्ध अब अगाडि बढ्न नसक्ने अवस्थामा आएर अडिएको छ ।
केही दिन अगाडि शिल्पाले आफूमाथि घरेलु हिंसा भएको भन्दै प्रहरी परिसरमा छविविरुद्ध उजुरी हालेकी थिइन् । उजुरी पश्चात् प्रहरीले दुबै पक्षलाई बोलाएर सहमति गराएको थियो । छवि र शिल्पा दुबैले अब कहिल्यै झगडा नगर्ने भनेर कागजी सम्झौता पनि गरे । तर, शिल्पा भने अब कुुनै हालतमा फेरि छविसँग नबस्ने अडानमा छिन् ।
उनले सोमबार एक भिडियो अन्तर्वार्तामा आफूले डिभोर्सका लागि केस फाइल गरिसकेको बताएकी छन् । छवि भने आफू शिल्पाकै काखमा प्राण त्याग गर्न चाहने बताउँदै मिडियामार्फत् उनलाई घर फर्किन आग्रह गरिरहेका छन् । सञ्चारमाध्यमसँग कुराकानीको क्रममा भक्कानिँदै शिल्पाले श्रीमान् ओझाबाट तीन वर्षसम्म निकै यातना सहेर बसेको बताएकी छिन् । उनले छविलाई पटक–पटक मार्ने प्रयास गरेको, कोही पुरुषसँग हाँसेर बोले विभिन्न खाले शंका र अप्रिय वचन बोल्ने गरेको लगायतका आरोप लगाएकी छिन् ।
तर, यो मान्न तयार छैनन्, छवि । सामान्य घर झगडा हुने गरेको भएता पनि आफूले कहिल्यै शंका गरेर शिल्पामाथि कुटपिट नगरेको उनको भनाई छ । श्रीमती शिल्पाले विभिन्न आरोप लगाएपछि सोमबार साँझ फेसबुकमा लामो स्टाटस लेखेर निर्माता छविराज ओझाले आफूमाथि लगाएको आरोप छातिमा हात राखेर सोच्न आग्रह गरेका छन् । उनले लेखेका छन्, ‘मैले ५२ बर्षको उमेरमा तीनजना श्रीमतीसँग सम्बन्ध बिच्छेद भइसकेपछि तपाईंसँग चाहिँ जिन्दगी बिताउन सक्छु होला भनेर जिन्दगीका सबथोक कम्प्रमाइज गरेर माया गरेर बिहे गरेको श्रीमती हो तपाईं । छातिमा हात राखेर आज एकछिनलाई आफैंलाई नढाटी सम्झनुस् तपाईंले लगाएका कति आरोपहरु सत्य छन् ?’
https://www.facebook.com/chhabiraj.ojha.5/posts/2290396714410884
निर्माता ओझाले शिल्पालाई पनि अन्यायमा नपर्ने विश्वास दिलाएका छन् । अरुको कुरा नसुनि घर फर्किन आग्रह गर्दै उनले लेखेका छन्, ‘आउनुस् हाम्रो घरको ढोका सधैं तपाईंको लागि खुल्ला छ । हैन र यदी तपाईं साच्चै मसँग बस्न सक्नुहुन्न भने पनि एक पटक मसँगै आएर टेबलमा कुरा गर्नुस् । मेरो इतिहास पल्टाएर हेर्नुस् आजसम्म मैले कुनै पनि श्रीमतीलाई अन्यायमा पारेको छैन ।’ अब उनीहरुको झगडाले कुन रुप लिने हो त्यो हेर्न बाँकी छ ।
२०७३ असार २९ गते सुटुक्क विवाह गरेका दुईले गएको ६ महिना अगाडि विवाह दर्ता गरेका थिए । शिल्पा छविकी चौथी श्रीमती हुन् । अभिनेत्री रेखा थापासँग १२ वर्ष लामो बैबाहिक सम्बन्धमा पूर्णविराम लागेपछि छविले शिल्पालाई श्रीमतीको रुपमा घर भित्राएका थिए । शिल्पाको पनि छविसँँग दोस्रो विवाह रहेको चर्चा छ ।
