१० भदौ, एजेन्सी ।
ब्राजिल सरकारले अमेजन रेनफरेस्टमा लागेको आगो नियन्त्रणका लागि सहयोग रकम अस्वीकार गर्ने जनाएको छ । सो सहयोग रकम जी सेभेन राष्ट्रले प्रस्ताव गरेको थियो ।
सोमबार फ्रान्सका राष्ट्रपति इम्यानुएल म्याक्रोनको आतिथ्यतामा समापन भएको जी सेभेन राष्ट्रका नेताहरुको सम्मेलनबाट अमेजन रेनफरेस्टमा लागेको आगो नियन्त्रणका लिनका लागि २२ मिलियन अमेरिकी डलर सहयोग गर्ने प्रस्ताव गरेका थिए ।
तर ब्राजिल सरकारले सो रकम स्वीकार नगर्ने जनाएको हो । ब्राजिलका अधिकारीले रकम अस्वीकार गर्नुको कुनै पनि कारण दिएका छैनन् ।
ब्राजिलका राष्ट्रपति जायर बोल्सोनारोले फ्रान्सले ब्राजिललाई आफ्नो उपनिवेश जस्तो व्यवहार गरेको आरोप लगाएका छन् ।
ब्राजिलका रक्षामन्त्री फेर्नान्डो अजेवेडो इ सिल्भाले अमेजनमा लागेको आगो नियन्त्रण बाहिर नरहेको बताएका छन् । अमेजन रेनफरेस्टमा लागेको डढेलो र वातावरणीय संकटसँग जुध्नका लागि ४४ हजार सैनिक परिचालन गरिएको उनले बताएका छन् ।
