१३ असोज, एजेन्सी ।
साउदी अरेबियाका युवराज मोहम्मद बिन सलमान ले विश्व बजारमा तेलको मूल्य कल्पना गरे भन्दा धेरैले बढ्न सक्ने चेतावनी दिएका छन् ।
इरान विश्वका लागि खतरा रहेको र विश्व समुदाय इरानलाई रोक्नका लागि तत्काल सक्रिय नभएमा तेलको मूल्य अत्याधिक मात्रामा बढ्ने तथा विश्व अर्थतन्त्रमा गम्भीर असर पर्ने बताएका हुन् ।
अमेरिकी टेलिभिजन नेटवर्क सिबिएसको ‘सिक्सटी मिनेट’ कार्यक्रमका लागि दिएको अन्तर्वार्ताको क्रममा साउदी युवराज एमबिएसले इरानका गतिविधि भड्काउ र खतरनाक रहेको तर आफू त्यसको समाधानका लागि सैन्य विकल्पको सट्टा राजनीतिक या कूटनीतिक समाधानकै पक्षमा रहेको बताएका छन् ।
साउदी अरेबियाको शासक एमबिएसले वासिङ्गटन पोस्टमा लेख्ने पत्रकार जमाल खाशोग्गीको हत्याको आदेश आफूले दिएको भन्ने आरोप अस्वीकार गरेका छन् । तर देशको नेताको हैसियतमा अन्ततः खाशोग्गीको हत्याको जिम्मेवार आफू हुने उनले बताएका छन् ।
खाशोग्गीको हत्यापछि विश्वव्यापी रुपमा सुधारात्मक नेताका रुपमा स्थापित हुँदै गएको एमबिएसको छवीमा आँच आएको थियो । विश्व समुदायले उनको आलोचना गर्दै आएका थिए ।
तर सेप्टेम्बर १४ मा साउदी अरेबियाका सरकारी स्वामित्वमा रहेका दुई ठूलो तेल प्रशोधन केन्द्रमा ड्रोन तथा क्रुज मिसाइल आक्रमण भएपछि अमेरिकासहितका देश साउदी अरेबियाको पक्षमा उभिएका छन् ।
