१८ असोज, विराटनगर। वष्फोटक पदार्थसहित नेत्रविक्रम चन्द विप्लव समूह (नेकपा)का मोरङ जिल्ला सेक्रेटरी सहित २ जना पक्राउ परेका छन । जिल्ला प्रहरी कार्यालय मोरङले उनीहरुलाई पक्राउ गरेको हो ।
गत असोज ९ गते नेकपा विप्लव समूहका युवा संगठन सदस्य विपिन भनिने रामु मग्राती विष्फोटक पदार्थको अनुशन्धानको सिलसिलामा पक्राउ परेको जनाइएको छ । यस्तै असोज १७ गते मोरङको बुढीगंगा गाँउपालिका ३ बस्ने मोरङ जिल्ला सेक्रेटरी आभाष भनिने कुमार खतिवडा विराटनगर ४ स्थित इक्राही चौकबाट पक्राउ परेको प्रहरीले बताएको छ । खतिवडाले राजेन्द्र लिम्वुको घरमा डेरा लिएर लुकाइ राखेको नेकपा विप्लव समूहका लिखित दस्तावेजहरु समेत प्रहरीले फेला पारेको छ । जसमा खतिवडाको सक्कल नेपाली नागरिकता, नेपाल कम्युनिष्ट पार्टीको सहयोग रसिद २ ठेली, मोवाइलहरु, पार्टीको छाप, झण्डा, रातो खवर पत्रिका लगायतका सामानहरु बरामद भएको प्रहरीले जनाएको छ ।
यसैगरी प्रतिबन्धित विप्लव समूहले मोरङमा भण्डारण गरेर राखेको विष्फोटक पदार्थ प्रहरीले बरामद गरेको छ । जिल्ला प्रहरी कार्यालय, मोरङले चलाएको अप्रेशनका क्रममा ४३ वटा जिलेटिन बरामद भएको हो । मोरङ प्रहरीका डीएसपी राजकुमार खिउजुले विष्फोटक पदार्थसहित उनीहरुलाई पक्राउ गरिएको बताए । यसअघि १२ साउनमा झापाको इलाका प्रहरी कार्यालय, विर्तामोडले झापामा विप्लव समूहले विष्फोटक पदार्थ भण्डारण गरेको ठाउँमा पनि छापा मारेको थियो ।
त्यसक्रममा २ सय ५ लोला विष्फोटक पदार्थ बरामद भएको थियो । दुवै अपरेशनमा १ नं. प्रदेश प्रहरी कार्यालयको सहयोग थियो । मोरङका एसपी विश्व अधिकारीले सूचना र सुराकीका आधारमा अपराधी पक्राउ गर्न सहज हुने भएकाले कसैमाथि शंका लागे तुरुन्तै प्रहरीलाई जानकारी गराउन आग्रह समेत गरे ।
उनले आम सर्वसाधारणपनि प्रहरीको ठूलो सहयोगी हुने भन्दै यस्ता आपराधिक गतिविधि नियन्त्रण गर्न सवैको साथको आवश्यकता रहेकोमा पनि जोड दिए ।
