७ कात्तिक, काठमाडौँ ।
ग्रामीण तथा पहाडी क्षेत्रमा कच्ची सडक निर्माणको होड चलेको छ । स्थानीय तहले धमाधम सडक निर्माणलाई प्राथमिकता दिएका हुन् । सडक निर्माणमै परिचालित स्काभेटरले च्यापिएर बिहीबार बैतडीमा एक जनाको मृत्यु भएको छ भने रुकुमपूर्वमा डोजर दुर्घटना हुँदा चालकको मृत्यु भएको छ ।
प्रहरीका अनुसार बैतडीको मेलौनी नगरपालिका–५ पेलेमा आज स्काभेटरले च्यापिएर एक जनाको घटनास्थलमै मृत्यु भएको हो । लेकबाट पेलेसम्मको शाखा सडक खन्दै गरेको स्काभेटरमा च्यापिएर स्थानीय ५५ वर्षीय शुक्रबहादुर पुजाराको मृत्यु भएको हो ।
भुईमा खसेका पुजारालाई सोही स्काभेटरले च्यापेको थियो । दुर्घटना पश्चात् फरार रहेका चालकको खोजी भइरहेको ईलाका प्रहरी कार्यालय तस्वदेहीले जनाएको छ । केही दिनअघि बैतडीकै दशरथचन्द नगरपालिकामा कच्ची सडक खन्ने क्रममा विवाद ८ जना घाइते भएका थिए । सहमति विना सडक खन्न नदिने अडान राख्दै आएका स्थानीयलाई स्काभेटर चालकले स्काभेटर नै प्रयोग गरेर लखेटेका थिए ।
यस्तै, रुकुमपुर्वको भुमे गाउँपालिका–२ सैपातुनमा बिहीबार डोजर दुर्घटना हुँदा चालकको मृत्यु भएको छ । भुमे गाउँपालिका–२ कै ४८ वर्षीय दुर्गाबहादुर बुढामगरको घटनास्थलमै मृत्यु भएको हो । रा१ग २९ नम्बरको जेसिवी डोजर सडकबाट करिब ५० मिटर तल खसेको प्रहरीले जनाएको छ ।रासस
