२ मंसिर, विराटनगर ।
मोरङको कटहरी सबस्टेसन संचालन गर्ने र विवादित क्षेत्र गिधनीयामा प्रसारण लाइन अण्डरग्राउण्ड गर्ने काममा स्थानीयले पुनः अवरोध गरेका छन् । हाइटेन्सन विद्युत प्रसारण लाइनका कारण स्वास्थ्यमा प्रतिकुल असर पर्ने र गर्भ नरहने भन्दै ग्रामथान गाँउपालिका–५ गिधनियाका स्थानीयहरुले अवरोध गरेका हुन् ।
प्रदेश १ का मुख्यमन्त्री शेरधन राईको पहलमा नेपाल विद्युत प्राधिकरणको कार्यकारी निर्देशक कुलमान घिसिङ , सांसद अमनलाल मोदी र ग्रामथान गाँउपालिका अध्यक्ष बीच भएको सहमति अनुसार ग्रामथानको गिधनिया वस्तीमा रोकिएको दुहबी–कटहरी ३३ केभिए प्रसारण लाइन विस्तार गर्न डोजरसहित सोमबार गिधनिया पुगेको टोलीलाई सर्वसाधारणले अवरोध गरेका थिए । स्थानीयहरुले अवरोध गरेपछि निर्माणका लागि पुगेको स्काभेटर लगायतका उपकरणहरु फर्काउनु परेको छ ।
वैकल्पिक रुटबाट मात्र विद्युत प्रसारण लाइन लैजानु पर्ने संघर्ष समितिका संयोजक भक्कुलाल विश्वास थारुले बताए । यस अघि पनि त्यस क्षेत्रका संघिय सांसद अमनलाल मोदीले अवरोध गर्दा प्रसारण लाइन तान्न सकिएको थिएन । गत कार्तिक १ गते विराटनगर स्थित मुख्यमंत्री कार्यालयमा सो क्षेत्र भएर ४५ दिन भित्र प्रसारण लाइन निर्माण सक्ने सहमति भएको थियो ।
सो क्षेत्रका संघीय सांसद अमनलाल मोदीले भने अवरोध भएको विषय आफूलाई पनि जानकारीमा आएको बताउँदै सबैको कुरा बुझ्न लागिरहेको बताए। उनले भने, ‘मैले पनि कुरा बुझ्दैछु। सबैलाई मिलाएर अगाडि बढ्नुपर्छ।’
गिधनियाको करिब ३ किलोमिटरमा विद्युतको तार तान्न नसक्दा कटहरीमा निर्माण गरिएको सबस्टेशन चार्ज हुन सकेको छैन । यसले गर्दा कटहरी रंगेली कोरिडोरमा लो भोल्टेज र विद्युत ट्रिपिङको समस्या भईरहेको छ ।
