१५ मंसिर, विराटनगर ।
मोरङ प्रहरी फेरि पनि सम्मानित भएको छ । एचआईभी र एड्स संक्रमण न्यूनीकरण तथा रोकथाममा सघाउ पुर्याएको भन्दै जिल्ला प्रहरी कार्यालय मोरङलाई सम्मान गरिएको छ ।
३१ औँ अन्तराष्ट्रिय एड्स दिवसको अवसरमा आइतबार प्रदेश १ स्वास्थ्य निर्देशनालय तथा स्वास्थ्य कार्यालय मोरङले एचआईभी र एड्स संक्रमण न्यूनीकरण तथा रोकथामका लागि जिल्ला प्रहरी कार्यालयले सञ्चालन गरिरहेको लागुऔषध विरुद्धको अभियान Campaign Against Narcotics (CAN) को मुल्यांकन् गर्दै जिल्ला प्रहरी कार्यालयका तर्फबाट एसपी विश्व अधिकारीलाई सम्मान प्रदान गरिएको हो ।
अधिकारीलाई प्रदेश १ का सामाजिक विकास मन्त्री जीवन घिमिरे, प्रदेश १ का स्वास्थ्य प्रमुख ज्ञानबहादुर बस्नेत र विराटनगर महानगरपालिकाका मेयर भीम पराजुलीले संयुक्तरुपमा सम्मान पत्र प्रदान गरे । मोरङमा गत वर्षको साउनदेखि सञ्चालन हुँदै आएको सो अभियानले एचआईभी र एड्स संक्रमण न्युनीकरणमा उल्लेखनीय सहयोग गरेको ठहर गरिएको छ । यस अभियानबाट ५ हजार जना लाभान्वित भईसकेका छन् भने दैनिक २५ देखि ३० जनालाई सामेल गराइँदै आएको जिल्ला प्रहरी कार्यालय मोरङले जनाएको छ ।
एड्स दिवसको अवसरमा आयोजित कार्यक्रममा एड्स संक्रमण न्यूनीकरणमा योगदान पुर्याउने सामाजिक अभियान्ता अनुपकुमार सापकोटा, सुशिल रिजाल,विष्णुपन्त शर्मा आचार्य लगायतलाई सम्मान गरिएको थियो । दिवसको अवसरमा जनचेतना जगाउने उद्देश्यले एचआईभी र एड्स संक्रमण न्यूनीकरण तथा रोकथाममा काम गरिरहेका विभिन्न संस्था तथा व्यक्तिहरुको उपस्थितीमा आईतबार बिहान प्रभातफेरी गरिएको थियो । यसअघि बाल संरक्षणमा खेलेको महत्वपूर्ण भूमिकाका लागि मोरङ प्रहरीलाई सिविन नेपालले गतसाता सम्मान गरेको थियो ।
