११ पौष, हेटौंडा । काठमाडौं जोड्ने छोटो दूरीको मार्ग अन्तर्गत् मकवानपुरको इन्द्रसरोवर–३ ओखरडाँडामा टाटा सुमो दुर्घटना हुँदा मृत्यु हुनेको संख्या ५ गुगेको छ । ३ जनाको घटनास्थलमै मृत्यु भएको थियो । दुर्घटनामा ५ जना घाइते भएका थिए।
रौतहटको चन्द्रपुरबाट काठमाडौंतर्फ आउँदै गरेको ना १ ज ३४३३ नम्बरको शिखरापुर यातायातको सुमो दिउँसो करिब एक बजेको समयमा दुर्घटना हुँदा घटनास्थलमा ३ जनाको मृत्यु भएको थियो भने उपचारका लागि लैजाँदै गर्दा बाटोमा २ जनाको मृत्यु भएको जिल्ला प्रहरी कार्यालय मकवानपुरका प्रहरी निरीक्षक ललन प्रसाद कुर्मीले जनकारी दिए ।
मृतकहरुमध्ये हालसम्म २ जनाको पहिचान खुलेको छ भने ३ जनाको अझै छैन। मृत्यु हुनेहरुमा रौतहट चपुरका २१ वर्षीय मनिष विक र २० वर्षीय सिर्जना विक रहेका छन्।
उनीहरु पतिपत्नी रहेको प्रहरीले जनाएको छ। प्रहरीका अनुसार मृतकहरु तीनैजनाको शव हाल काठमाडौंस्थित टिचिङ अस्पतालमा राखिएको छ।
घाइते सर्लाही बागमती–११ का २२ वर्षीय रञ्जित रिजाल र रौतहट बरथुवा–५ का ५६ वर्षीय जय शाहको काठमाडौंस्थित बयोधा अस्पतालमा उपचार भइरहेको निरीक्षक कुर्मीले जानकारी दिए।
यसैगरी सुमो चालक हेटौंडा–१७, गंगटेका अनिल विक र सुमोमा सवार सर्लाही बागमती–९ का २७ वर्षीय रञ्जित रिजालको काठमाडौंस्थित मेडिसिटीमा उपचार भइरहेको छ ।
प्रहरी निरीक्षक कुर्मीका अनुसार सवारी तीव्र गति र अनियन्त्रित हुँदा सडकबाट करिब दुईसय मिटर तल खसेर दुर्घटना भएको थियो ।
