२ माघ, विराटनगर ।
विराटनगर– ८ सिंघिया घाटमा जलाउन लागेको शव प्रहरीले नियन्त्रणमा लिएको छ । मृत्यु शंकास्पद भएको भन्दै माईती पक्षले उजुरी गरेपछि विराटनगर महानगरपालिका– ८ कि २८ वर्षकी प्रेमदेवी साहको शव नियन्त्रणमा लिएको हो ।
शवको घाटीमा चोट देखिएपछि प्रहरीले महिलाका श्रीमान गोविन्द साहलाई पनि नियन्त्रणमा लिएको छ । बिहीबार बिहान साढे ५ बजे प्रेमदेवीको मृत्युका खबर पुगेपछि बराहक्षेत्र नगरपालिका– ४ कालाबञ्जार घर भएका दाजु राजु साह आएका थिए । उनले घाट लैजाने तयारी गर्दै गर्दा बहिनीको घाँटीमा डाम देखिएपछि प्रहरीलाई खबर गरेको बताए ।
उनका अनुसार प्रेमदेवीको शव परिवार, केही छिमेकी र आफन्तले हतार हतार लिएर विश्वकर्मा चोक पूर्व रहेको सिंघिया घाटतर्फ लागेर जलाउन लागेका थिए । शंकास्पद मृत्यु भएको सूचना आएपछि वडा प्रहरी कार्यालय हाटखोलाबाट प्रहरी नायव निरिक्षक मनोज अधिकारी र जिल्ला प्रहरी कार्यालय मोरङका प्रहरी निरक्षक रामबहादुर ढकाल नेत्रृत्वमा टोली घटनास्थल पुगेर शव नियन्त्रणमा लिएको थियो ।
जिल्ला प्रहरी कार्यालय मोरङका एसपी विश्व अधिकारीका अनुसार मृतकको शव पोस्टमार्टमका लागि कोशी अञ्चल अस्पताल पठाएको र मृतक महिलाको घाँटीमा डाम देखिएको तथा मृत्युबारे श्रीमानको जवाफ पनि शंकास्पद पाइएकाले श्रीमान गोविन्द साहलाई नियन्त्रणमा लिएको छ ।
बहिनीको घाटीमा शंकास्पद चोट देखिएपछि सोधीखोजी गर्दा जवाफ नपाएपछि प्रहरीलाई खबर गरेको मृतकका दाजु राजु साहले बताए ।घरमा बहिनीलाई हेला गर्ने गरेको बताउँदै उनले घाटीमा चोट देखिएकाले अनुसन्धान हुनुपर्ने बताए । उनले भने ‘बहिनी बिरामी थिइन्, माइतबाट १५ दिन अघि मात्र घर आएकी हुन् । आज एक्कासी मृत्युको खबर आयो ।’
मृतक महिलाको १२ वर्षअघि विराटनगर ८ बलुवाहीका गोविन्द साहसँग भएको थियो । प्रेमदेवीका श्रीमान गोबिन्द साहले घाटीमा देखिएको चोट पुरानो भएको बताएका छन् । करिब पाँच महिनाअघि आत्महत्या प्रयास गर्दा आफूले बचाएको बताउँदै उनले त्यतिबेला नै घाँटीमा चोट रहेको बताए ।
बुधबार मध्यरातसम्म आफूले श्रीमतीसँग गफ गरेको बताउँदै उनले बिहान उठ्दा श्रीमती खाटमुनि मृत अवस्थामा भेटिएको बताए । मृतक साहका ८ र १० वर्षका दुई छोराहरु छन् ।
