५ माघ, रुपन्देही । प्रदेश नम्बर ५ प्रदेश सभाको हिउँदे अधिवेशन आइतबार दिउँसो १ बजे सुरु हुँदैछ ।
मुख्यमन्त्री शङ्कर पोखरेलको सिफारिसमा प्रदेश प्रमुख धर्मनाथ यादवले प्रदेश सभाको हिउँदे अधिवेशन आइतबार दिउँसो १ बजेका लागि आह्वान गरेका हुन् ।
प्रदेशसभा सचिवालयका सचिव दुर्लभकुमार पुनका अनुसार अधिवेशनमा मुख्यमन्त्री शङ्कर पोखरेल र प्रदेश सभामा प्रतिनिधित्व गर्ने दलका प्रतिनिधिहरुले शुभकामना दिने कार्यसूची छ । हिउँदे अधिवेशनमा प्रदेश सरकारले ६ वटा विधेयक पेस गर्ने तयारी गरेको प्रवक्ता बैजनाथ चौधरीले जानकारी दिए । प्रदेश सभाको चौथो अधिवेशनसम्म ४९ वटा विधेयक पारित भइसकेका छन् ।
हिउँदे अधिवेशनले प्रदेशको स्थायी राजधानी र नामको टुङ्गो लगाउने प्रदेश सभामा प्रतिनिधित्व गर्ने दलका नेताहरुले बताएका छन् । आइतबारको कार्यसूचीमा यो विषयले प्रवेश नपाए पनि यही अधिवेशनबाट प्रदेशको राजधानी र नामाकरणको टुङ्गो लगाउन नेपाली काङ्ग्रेसले दबाब दिने परामर्श समितिका सदस्यसमेत रहेकी सचेतक निर्मला क्षेत्रीले बताइन् ।
प्रदेश सभाको नाम र राजधानीको सिफारिस गर्न बनाइएको विशेष समितिले समेत प्रदेश सभामा आफ्नो प्रतिवेदन बुझाइ सकेकाले अब ढिला गर्न नहुने काङ्ग्रेस सचेतक क्षेत्रीको भनाइ छ । राजधानी तोक्दा पूर्वाधार बनिसकेको क्षेत्रलाई उपेक्षा गर्न नहुने उनले जोड दिइन् ।
प्रदेश सभामा नेकपाका प्रमुख सचेतक भूमिश्वर ढकालले पनि सबै पार्टी, प्रदेश सभाका सदस्यहरुको सहमतिमा प्रदेशको स्थायी राजधानी र नामाकरणको टुुङ्गो यही अधिवेशनले लगाउनेमा विश्वस्त रहन आग्रह गरे ।
सकेसम्म ह्विप लगाउने पक्षमा नेकपा नरहेको भन्दै उनले प्रदेशका सबै जनतालाई पायक पर्ने ठाउँ, भौतिक सुविधा र सहमतिलाई आधार बनाएर प्रदेशको राजधानी र नामको टुङ्गो लाग्छ प्रमुख सचेतक ढकालले बताए । सहमतिको लागि अन्तिमसम्म कसरत गर्ने र नभए केन्द्रको निर्देशन र प्रदेश नम्बर तिनको नजिरलाई नजरअन्दाज गर्न नमिल्ने प्रमुख सचेतक ढकालले बताए ।
संविधानअनुसार प्रदेश सभाको स्थायी राजधानी प्रदेश सभाको दुई तिहाइ बहुमतले तोक्ने व्यवस्था छ । ८७ सदस्यीय प्रदेश सभामा नेकपाका ६१, नेपाली काङ्ग्रेसका १९, समाजवादी फोरमका ५ तथा राजपा र राजमोका एक–एक सदस्य रहेका छन् । प्रदेश सभामा नेकपाको पक्षमा दुई तिहाइ मत रहेकाले नेकपाको निर्णय नै प्रदेशको स्थायी राजधानी र नामाकरणको लागि अन्तिम हुनेछ ।
