२९ माघ, काठमाडौं ।
सन्दीप लामिछाने ओडीआई क्रिकेटमा एकै खेलमा सर्वाधिक विकेट लिने नेपाली खेलाडी बनेका छन् । काठमाडौँमा बुधबार सम्पन्न आईसीसी क्रिकेट वल्र्ड कप लिग २ अन्तर्गत त्रिकोणात्मक सिरिजमा सन्दीपले अमेरिकाविरुद्ध ६ विकेटको कीर्तिमान बनाएका हुन् ।
यसअघि सोमपाल कामीले एकै खेलमा ५ विकेट लिएका थिए । गत वर्ष नेपालले यूएई टुर गर्दा सोमपालले दोस्रो खेलमा ५ विकेट लिएका थिए ।
कीर्तिपुरस्थित टीयू मैदानमा भइरहेको खेलमा सन्दीपले धातक बलिङ गर्दै अमेरिकाका ६ ब्याट्सम्यानलाई आउट गरे । उनले ६ ओभर बलिङ गर्दा १ ओभर मेडन राख्दै १६ रन मात्र खर्चेर ६ विकेट लिएका हुन् ।
सन्दीप र सुशनले धातक बलिङ गर्दै १० विकेट लिएपछि नेपालले अमेरिकालाई १२ ओभरमै ३५ रनमा अलआउट गरेको हो । ओडीआई क्रिकेट इतिहासमा यो विश्वकै सबैभन्दा कम स्कोरको बराबरी हो । यसअघि सन् २००४ मा जिम्बावे श्रीलंका विरुद्ध १८.४ ओभरमा ३५ रनमै अलआउट भएको थियो । खेलमा अमेरिकालाई नेपालले ८ विकेटले हराएको छ ।
रंगशालालाई ७० हजार ७ सय ८४ रुपैयाँ सहयोग
स्पिनर सन्दीप लामिछानेले चितवनमा बन्दै गरेको गौतम बुद्ध अन्तर्राष्ट्रिय क्रिकेट मैदानलाई ७० हजार ७ सय ८४ रुपैयाँ सहयोग गर्ने भएका छन्। उनले नेपालमा जारी आईसीसी वल्र्ड क्रिकेट लिग–२ अन्तर्गतको शृंखलामा लिने हरेक विकेटमा सगरामाथाको उचाई बराबर ८,८४८ रंगशालालाई सहयोग गर्ने घोषणाअनुसार उक्त रकम सहयोग गर्ने भएका हुन्। उनले यस श्रृङ्खलामा जम्मा ८ विकेट लिएका छन् ।
