२९ माघ, रूपन्देही ।
प्रदेश ५ को कोहलपुरबाट नेकपाको देशव्यापी अभियानको शुरुवात हुने भएको छ ।
केन्द्रीय समितिको निर्णयअनुसार दुई अध्यक्षले देशब्यापी अभियान सञ्चालन गर्ने र सुरुवात प्रदेश ५ बाट गर्ने निर्णय गरेका थिए । नेकपाको प्रदेश ५ को बुधबार बुटवलमा बसेको कार्यालय बैठकले बाँकेको कोहलपुरबाट शुरु गर्ने निर्णय गरेको हो ।
दुई अध्यक्षले केन्द्रीय अभियान फागुन ४ गते प्रदेश ५ को बुटवलबाट शुरु गरेर फागुन २१ गते विराटनगरबाट समापन गर्ने निर्णय गरेको थियो। तर, प्रदेश समितिले कोहलपुरबाट शुरु गर्ने निर्णय गरेको नेकपा प्रदेश ५ का कार्यालय सदस्य भुमिश्वर ढकालले जानकारी दिए।
‘प्रदेशको कार्यालय बुटवलमै रहेकाले त्यहींबाट गर्ने भन्ने केन्द्रको निर्णय भएपनि प्रदेश समितिले कोहलपरबाट गर्ने निर्णय गरेको छ। फागुन ४ गते कोहलपुरमा अगुवा कार्यकर्ता भेला गरेर अभियानको शुरुवात गरिनेछ,’ ढकालले भने।
प्रदेश समिति अध्यक्ष ओनसरी घर्तीको अध्यक्षता र प्रदेश इन्चार्ज एवं मुख्यमन्त्री शंकर पोखरेलको प्रमुख आतिथ्यतामा बसेको बैठकले फागुन ४ गते भेला र प्रशिक्षण गर्ने, ५ गते प्रदेशका लागि ३ महिने अभियानको खाका तयार गर्ने, फागुनमा जिल्ला तह देखि तल्लोतह सम्मका पाटीका बैठक गर्ने, जनसंगठन निर्माण गर्ने, चैतमा सर्वसाधारण र कार्यकर्ताबाट सुझाव संकलन गर्ने, तीन तहकै सरकारको कामको समिक्षा गर्ने, प्रचारप्रसार गर्ने र बैशाखमा बृहत जनसभा गर्ने निर्णय गरेको कार्यालय सदस्य बलराम अधिकारीले जानकारी दिए।
बैठकले सबै जिल्लालाई समान महत्व दिएर सबै जिल्लामा प्रदेश समितिको बैठक र भेला राख्ने निर्णय गरेको उनले बताए।
