विराटनगर, चैत १९
संयुक्त राष्ट्रसंघीय सुरक्षा परिषदले अन्तर्राष्ट्रिय प्रतिबन्ध छल्न उत्तर कोरियालाई सघाएको आरोपमा २७ वटा पानीजहाज, २१ वटा पानीजहाज कम्पनी र एक व्यक्तिलाई कालोसूचीमा राखेको छ ।
कालोसूचीमा उत्तर कोरियामा रहेका १६ वटा कम्पनी, हंगकंगमा दर्ता गरिएका पाँचवटा, चीन र ताइवानका दुई,दुईवटा र पनामा तथा सिंगापुरका एक–एकवटा कम्पनी परेका छन् ।
राष्ट्रसंघले प्योङयाङलाई तोकेरै गरेको यो अहिलेसम्मकै ठूलो दण्ड हो । प्रतिबन्ध लगाइएका तेल ट्यांकर र कार्गाे पानीजहाजलाई बन्दरगाह प्रवेशमा विश्वव्यापी रुपमा रोक लगाइएको छ भने कम्पनीको सम्पत्ति पनि रोक्का गरिएको छ । प्रतिबन्धका कारण उत्तर कोरियाको आयात निर्यात सीमित हुन थालेको खबरमा उल्लेख छ ।
