३१ जेष्ठ, काठमाडौं ।
नेत्र विक्रम चन्द विप्लव समूहका एक कार्यकर्तालाई विस्फोटक पदार्थ सहित प्रहरीले पक्राउ गरेको छ।
महानगरीय प्रहरी परिसर ललितपुरबाट खटिएको टोलीले शुक्रवार साँझ ललितपुर महानगरपालिका ११ इखाछे बङ्गलामुखी नजिकैबाट विस्फोटक सहित ४१ वर्षीय श्याम भन्ने सानुराज बज्राचार्यलाई नियन्त्रणमा लिएको हो।
विशेष सूचनाको आधारमा बज्राचार्यको घर कोठा खानतलासी गर्दा घरको तेस्रो तल्लामा रहेको कोठामा लुकाई राखेको अवस्थामा मेटासिटको भाँडो इम्प्रुभाइज गरी बनाएको सकेट बम फेला परेको परिसरका एसपी तुलबहादुर कार्कीले जानकारी दिए।
बम नेपाली सेनाको बम डिस्पोजल टोलीले घरको कोठा बाहिर निकालेर सुरक्षित स्थान लगी डिस्पोज गराएको एसपी कार्कीले जानकारी दिए। प्रहरीले कटुवा पेस्तोल विप्लव समूहसँग सम्बन्धित पुस्तक, लेटर प्याड समेत फेला पारिएको जनाएको छ।
