३१ जेष्ठ, नेपालगञ्ज ।
बाँकेमा धमाधम कोरोना संक्रमित घर फर्किरहेका छन् ।
स्वास्थ्य मन्त्रालयको निर्देशिका अनुसार अहिलसम्म एक सय ७० जना कोरोना संक्रमित डिस्चार्ज भएका छन् । निर्देशिकामा १४ दिन अस्पतालको आइसोलेशन वा आइसोलेसन सेन्टरमा बसेका संक्रमितलाई पुनः जाँच नगरी घर पठाउन सकिने उल्लेख छ ।
त्यही निर्देशिकालाई टेकेर बाँकेमा १४ दिन पुगेका संक्रमितलाई घर पठाउने काम भइरहेको छ । पछिल्लो पटक डुडुवाका आठजना डिस्चार्ज भएका छन् । डुडुवामा सुरुवाति चरणमा कोरोना भाइरसको संक्रमण देखिएकाहरु घर फर्किएका हुन् ।
जिल्ला स्वास्थ्य कार्यालय, बाँकेका अधिकृत एवं कोरोनाका फोकलपर्सन नरेश श्रेष्ठले डुडुवामा आठजना डिस्चार्ज भएसँगै बाँकेमा एक सय ७० जनाले कोरोनालाई जितेको जानकारी दिए । उनका अनुसार, अब जिल्लामा एक सय २५ जना संक्रमित उपचारमा छन् । उनीहरुको १४ दिन पुगेको छैन ।
सरकारले लकडाउनलाई खुकुलो बनाउँदै बजार खोलिसक्दा र पुनः जाँच नगरी संक्रमितलाई घर पठाउँदा एकथरीले जोखिम बढ्न सक्ने आँकलन गरेका छन् । तर, विश्व स्वास्थ्य संगठनले १४ दिन आइसोलेशन अस्पताल वा आइसोलेशन सेन्टरमा बस्दा लक्षण नदेखिएका संक्रमितमा भाइरस बृद्धि नहुने र उसबाट अरुमा नसर्ने दाबी गरेको छ
जिल्ला स्वास्थ्य कार्यालय, बाँकेले स्वास्थ्य मन्त्रालयको निर्देशिका अनुसार काम गर्न आठवटै पालिकामा परिपत्र गरेको छ । अब पालिकाले आफ्नो ठाउँमा भएको आइसोलेशन अस्पताल वा आइसोलेशन सेन्टरमा बसेका व्यक्तिलाई १४ दिन पुगेपछि जिल्ला स्वास्थ्य कार्यालयको समन्वयमा घर पठाउन सक्ने फोकलपर्सन श्रेष्ठले बताए ।
पालिकाहरुले क्वारेन्टाइनमा रहेका व्यक्तिलाई सुरुमा आरडीटी गर्ने र पोजिटिभ देखिएमा पीसीआर जाँचका लागि स्वाब लिने र नेगेटिभ देखिएमा घर पठाइने गरिरहेका छन् । बाँकेमा हालसम्म ५ हजार ७ सय २४ जनाको आरडीटी र चार हजार नौ सय ५२ जनाको पीसीआर जाँच भएको छ ।
