४ असार, काठमाडौँ ।
कोरोनाको संक्रमणका कारण विभिन्न देशमा समस्यामा रहेका नेपालहिरु धमाधम नेपाल र्फकन थालेका छन् । मलेसियाबाट ११७ नेपाली काठमाण्डौ फर्किएका छन् । हिमालय एअरमार्फत १२ जना महिला र १०५ जना पुरुष गरी ११७ जना लिएर काठमाण्डौ अवतरण गरेको नेपाली दूतावासले जनाएको छ ।
मलेसियामा समस्यामा परेका नेपालीको स्वदेश फिर्तीका लागि थप ५ उडान हुनेछन् । जुन २० अर्थात शनिबार नेपाल एअरलाइन्सले, जुन २१ गते आइतबार हिमालय एअरलाइन्सले, जुन २५ मा पनि हिमालय एअरलाइन्सले नै र जुन २६ र २७ मा नेपाल एअरलाइन्सले उडान भर्नेछ । यो उडानको भाडादर ४५ हजार १ सय रुपैयाँ तोकिएको छ । फर्कने नेपाली स्वयंले नै यातायात खर्च व्यहोर्नु पर्ने नियम छ ।
यस्तै मलेसियामा रहेको नेपाली दूतावासले भिसा वा करार सकिएर स्वदेश फर्कने नेपालीसँग मलेसियाको अध्यागमनले चेकआउट मेमो खोजेकाले टिकट काट्नुअघि चेकआउट मेमो लिन सक्ने नसक्ने भनेर यकिन गर्न अनुरोध गरेको छ । चेकआउट मेमो लिएको तर कोरोनाको कारण म्याद सकिएको भए पनि स्वदेश फर्कन पाइने दूतावासले उल्लेख गरेको छ । भिसाको म्याद भएका तर बिदामा नेपाल फर्कनेले रोजगारदाताबाट बिदाको पत्र अनिवार्य साथमा राख्न पर्नेछ । कोरोना जाँचको रिपोर्ट नेगेटिभ आएको रिपोर्ट पनि साथमा हुनुपर्नेछ ।
यसैबीच, ओमानबाट १४७ जना नेपाली काठमाण्डौ आइपुगेका छन् । सलाम एअरको फ्लाइट नम्बर ओभी ४२७ मार्फत ११० जना पुरुष र ३७ जना महिला लिएर जहाज बिहीबार काठमाण्डौ अवतरण गरेको हो । उनीहरु विमानस्थल र होल्डिङ् सेन्टर हुँदै सिधै होम क्वारेण्टीनमा जान पाउनेछन् । ओमानमा कोरोनाको कारण अन्तर्राष्ट्रिय उडान बन्द हुँदा समस्यामा परेका नेपालीलाई त्यहाँ रहेको नेपाली दूतावासले सलाम अएरमार्फत स्वदेश फर्काइरहेको छ । दूतावासका कर्मचारी र राजदूत आफैं स्वदेश फर्कने नेपालीको विदाइका लागि विमानस्थल पुगेका थिए ।दूतावासले सरकारले तोकेकोभन्दा सस्तो भाडादरमा ओमानबाट नेपालीलाई स्वदेश फर्काएको छ ।
यसअघि असार एक गते पनि १६६ जना नेपाली स्वदेश फर्किसकेका छन् ।योसँगै ओमानमा समस्यामा परेका सबै नेपाली स्वदेश फर्किएको ओमानका लागि नेपाली राजदूत शर्मिला पराजुली ढकालले जानकारी दिइन् । उनकाअनुसार आवश्यक परेका मात्रै थप उडान हुनेछ ।
