योगेन्द्र योगी
१९ असार, दोहा ।
कोरोना भाइरस (कोभिड-१९) को महामारीका कारण विदेशमा समस्यामा परेका नेपालीलाई स्वदेश फर्काउने क्रममा आज पहिलो चरणको आठौं पटक नेपाल एयरलाइन्स एयरलाइन्सको उडानमार्फत् कतारबाट एक सय ४७ जना नेपाली स्वदेश फर्किएका छन् ।
कतारस्थित नेपाली दूतावासका द्वितीय सचिव प्रबीण भट्टराईले दिएको जानकारी अनुसार आठौं चरणको उडानमार्फत् ६ जना महिला र १४१ जना पुरूष रहेका छन् ।
दोहाबाट काठमाडौँको लागि उडेको आरए २३९२ नम्बरको सो उडानमा कोरोना भाइरसका कारण मृत्यु भएका दुई जना नेपालीको शव पनि नेपाल पठाईएको सचिव भट्टराईले बताए ।
प्राथमिकतामा परेका र स्वदेश फर्कनै पर्ने नेपालीहरुलाई उद्धार उडान मार्फत काठमाडौं पठाइएको दूतावासले जनाएको छ । उनीहरुलाई बिदाई गर्न दूतावासका द्वितीय सचिव प्रबीण भट्टराई, एनआरएनए कतारका प्रतिनिधिहरु हमाद अन्तर्राष्ट्रिय विमानस्थल पुगेका थिए ।
यस्तै अर्को उडान जुलाई ४ र ७ हिमालय एयरलाइन्सले र जुलाई ४, ७ र ९ मा नेपाल एयरलाइनले उडान गर्ने दूतावासले जनाएको छ ।
