१९ असार, एजेन्सी । चीनले यसै हप्ता हङकङमा नयाँ कानुनी व्यवस्था लागू गरेसँगै अमेरिकाले त्यसको कडा आलोचना गर्दै आएको छ । उक्त कानुन लागू गराउने चिनियाँ अधिकारीहरुलाई आफ्नो देश प्रवेशमा रोक लगाउने घोषणा गरिसकेको अमेरिकाले ती अधिकारीहरुसँग कारोबार गर्ने बैंकलाई कारवाही गर्ने कानुन अनुमोदन गरेको छ ।
विधेयकले हङकङको स्वायत्तताविरुद्ध कानुन ल्याउने चिनियाँ अधिकारीहरुसँग कारोबार गर्ने वित्तीय संस्थाहरुलाई कारवाही गर्ने छ । उक्त विधेयक अमेरिकाको तल्लो सदनमा बुहमतले अुमोदन गरेको हो । यता चिनियाँ विदेश मन्त्रालयका प्रवक्ता झाओ लिजियानले उक्त विधेयकमा हस्ताक्षर वा कार्यान्वयन नगर्न चेतावनी दिएका छन् ।
उनले आफूहरुको कदमविरुद्ध विधेयक अनुमोदन गरे प्रतिवाद गर्ने बताएको चिनियाँ सञ्चारमाध्यमहरुले उल्लेख गरेका छन् । यसअघि हङकङको मामिलामा आफ्ना नागरिकमाथि अभद्र व्यवहार गर्ने अमेरिकी अधिकारीहरुलाई चीनलेपनि भिसा प्रतिबन्धको घोषणा गरिसकेको छ ।
यसैबीच हङकङका प्रजातन्त्रवादी युवा अभियन्ता मध्येका एक चीनले विवादास्पद नयाँ सुरक्षा कानून लागु गरेपछि विस्थापित भएका छन् । प्रजातन्त्रवादी विद्यार्थी नेता तथा स्थानीय तहका प्रतिनिधि नाथन लले नयाँ सुरक्षा कानून लागु भएको दुई दिनपछि आफू हङकङबाट विस्थापित भएको बताएका हुन् ।
सन् २०१४ मा अम्ब्रेला प्रोटेस्टको क्रममा जेलमा पनि समय बिताएका उनले विदेशमै रहेर पनि प्रजातन्त्रको पक्षमा वकालत गरिरहने बताएका छन् । नयाँ सुरक्षा कानूनले हङकङले पाउँदै आएको स्वतन्त्रतालाई मार्ने भए पनि चीनले त्यसको बेवास्ता गरेको उनले बताएका छन् ।
