७ साउन, एजेन्सी । अस्ट्रेलियाको दोश्रो ठूलो जनसंख्या भएको मेलबर्न शहरले बुधबारबाट घरबाहिर निस्कदां अनिवार्यरूपमा मास्क लगाउनुपर्ने आदेश जारी गरेको छ।
कोरोना संक्रमण बढेपछि छिमेकी राज्य न्यू साउथ वेल्ससँगको सीमामा कडाइ गरेको भिक्टोरिया राज्यले संक्रमणको जोखिमलाई ध्यानमा राख्दै घर बाहिर निस्कदां अनिवार्य मास्क लगाउनुपर्ने नियम लगाएको हो ।
नयाँ आदेश अनुसार काम, शिक्षा वा स्वास्थ्य प्रायोजनका लागिमात्र एकअर्को राज्यमा आवतजावत गर्न पाइनेछ। सय वर्षको इतिहासमा यसै महिना पहिलोटपक दुवै राज्यको सीमा बन्द गरिएको थियो।
नयाँ व्यवस्था अनुसार भिक्टोरियाबाट शैक्षिक प्रायोजनका लागि न्यू साउथ वेल्स जाने मानिसहरूले अनिवार्य दुई साता ’सेल्फ(आईसोलेसन’मा बस्नुका साथै कोरोना परीक्षण गर्नुपर्नेछ। भिक्टोरियाबाट आउने मौसमी कामदारको हकमा भने यो नियम लागू हुनेछैन।
पछिल्ला साताहरूमा मेलबर्न शहरमा कोरोना भाइरसको संक्रमणमा व्यापक वृद्धि देखिएको छ। संक्रमण नर्सिङ होम तथा केही जेलहरूमा धेरै फैलिएको छ।
भिक्टोरियामा हालसम्म ६ हजार ३ सयको संख्यामा संक्रमित फेला परिसकेका छन् र यो अस्ट्रेलियाको कुल संक्रमित संख्याको आधा हुन आउँछ। राज्य मंगलबारमात्र ३ सय ६४ नयाँ संक्रमित फेला परेका थिए।
कोरोना महामारी सुरू भएयता अस्ट्रेलियामा १२ हजार ५ सय संक्रमित फेला परेका छन् भने १ सय २६ जनाको मृत्यु भइसकेको छ। संसारका अन्य विकसित मुलुकको दाँजोमा राम्रो स्वास्थ्य व्यवस्थापन भएपनि हाल बढिरहेको संक्रमणले अस्ट्रेलियाली अधिकारी र नीतिनिर्माताहरूको चिन्ता बढाइदिएको छ।
न्यू साउथ वेल्स राज्यको राजधानी सिड्नीमा १६ जना नयाँ संक्रमित फेला परेपछि त्यहाँकी राज्य प्रमुखले राज्यलाई उच्च सर्तकतामा राखिएको जनाएकी छिन्।
