१० साउन, वीरगन्ज ।
वीरगन्जको नारायणी अस्थायी कोरोना अस्पतालमा मृत्यु भएकी किशोरीको पीसीआर परीक्षणमा कोरोना संक्रमण पुष्टि भएको छ ।
शुक्रबार अपराह्न मृत्यु भएकी बारा परवानीपुर गाउँपालिका–४ निवासी १७ वर्षीय किशोरीको नारायणीको प्रयोगशालामा गरिएको पीसीआर परीक्षणमा कोरोना संक्रमण पुष्टि भएको नारायणी अस्पतालका प्रमुख मेडिकल सुपरिटेन्डेन्ट डा.मदनकुमार उपाध्यायले जानकारी दिए ।
गत बुधबार नारायणी अस्पतालमा किशोरीको स्वास्थ्य अवस्था गम्भीर भएपछि उनलाई वीरगन्ज हेल्थ केयर हस्पिटल लगिएको थियो । किशोरीमा झाडापखाला लाग्ने र जिउ काम्ने र स्वास प्रश्वासमा पनि समस्या देखिएको थियो ।
हस्पिटलका निर्देशक डा. अबुल हैस अन्सारीका अनुसार त्यहाँ उनको स्वाब संकलन गरी नारायणीको प्रयोगशालमा पठाइएको थियो । निर्देशक डा.अन्सारीले भने-‘अक्सिजन मेन्टेन भइरहेको थिएन, ७५ प्रतिशत देखाइरहेको थियो, छातीको एक्सरे गरेर हेर्दा फोक्सो पुरै खराब देखिएको थियो ।’ किशोरीमा स्क्रब टाइफससमेत पोजिटिभ देखिएको उनले बताए ।
निर्देशक डा. अन्सारीका अनुसार ती किशोरीको उपचारमा संलग्न ५ जना स्वास्थ्य कर्मचारीलाई क्वारेन्टाइनमा राखेर अस्पतालको आकस्मिक सेवा सिल गरिएको छ । यसअघि शुक्रबार बिहान नारायणी अस्थायी कोरोना अस्पतालमा वीरगन्ज महानगरपालिका– ११ निवासी ८५ वर्षीया वृद्धाको मृत्यु भएको थियो । ती वृद्धामा मुटुरोग र निमोनियाको समस्या थियो ।
