१४ साउन, काठमाडौं ।
गृह मन्त्रालय अन्तर्गतको राष्ट्रिय परिचयपत्र तथा पञ्जीकरण विभागले राष्ट्रिय परिचयपत्र उपलब्ध गराउने कार्यक्रम अन्तर्गत घुम्ती सेवा सञ्चालनका लागि करारमा दर्ता अपरेटरको माग गरेको छ। सप्तरी, सर्लाही र कास्कीमा १ सय ७६ जनालाई नियुक्त गरिने विभागले जनाएको छ।
खुला प्रतिस्पर्धा मार्फत चार महिनाको करार सम्झौता हुने र सार्वजनिक बिदामा पनि काम गर्नुपर्ने जनाईएको छ । जिल्ला प्रशासन कार्यालयबाट करार सम्झौता भएका कर्मचारीलाई दैनिक १२ सय पारिश्रमिक उपलब्ध गराइने विभागले जनाएको छ ।
१२ कक्षा पास गरेको र १८ वर्ष पूरा भएर ३५ वर्ष ननाघेकाहरुले दरखास्त दिन सक्ने छन्। लिखित परीक्षा भदौ १० गते हुनेछ ।
