२३ साउन, काठमाडौं ।
राष्ट्रिय क्रिकेट टोलीले बन्द प्रशिक्षण तत्काल नहुने भएको छ । नेपाल क्रिकेट संघ (क्यान) ले भदौ १ गतेदेखि प्रशिक्षण थाल्ने र २२ देखि २४ खेलाडी प्रशिक्षणमा बोलाउने तयारी गरेपनि कोरोना संक्रमण बढ्दै गएपछि तत्काल प्रशिक्षण सुरु नहुने भएको हो ।
बिहीबार क्यानले आगामी दुई महिनासम्म प्रशिक्षण गर्न नसकिने जनाएको छ । क्यानका सचिव अशोकनाथ प्याकुरेलले भने–‘हामीले प्रशिक्षण सार्नुपरेको छ । मुख्यतस् आगामी पाँच महिना सम्म कुनै अन्तर्राष्ट्रिय खेल छैन । अर्कोतर्फ काठमाडौंमा ७–८ जना मात्र खेलाडी छन् । धेरै खेलाडी काठमाडौं बाहिर छन् । कोरोनापनि पछिल्लो समय बढ्दै गएको छ । जसको कारण असोज अन्तिम अघि प्रशिक्षणको सम्भावना रहँदैन ।’
क्यानले प्रशिक्षणकै लागि टीयू मैदानभित्र परिसरमै क्वारेन्टाइन, खाना र बस्ने ब्यवस्था गर्ने जनाएको थियो । खेलाडी र टीयू मैदानका सबै कर्मचारीको कोरोना परिक्षण पिसिआर गर्ने बताएपनि अन्तिममा नगर्ने जनाएको छ । पिसिआर परिक्षण क्यानको पहलमा स्वास्थ्य मन्त्रालयले गर्ने जनाएको थियो ।
केहि समयअघि क्यानले ६ महिना देखि खेलाडी प्रशिक्षण बाहिर हुँदा लयमा ल्याउनको लागि बन्द प्रशिक्षण थाल्ने जनाएको थियो । राष्ट्रिय टोलीले अन्तिम पटक पछिल्लो समय फागुनमा थाईल्यान्डमा एसिसी इस्टर्न रिजन टि–२० प्रतियोगिता खेलेको थियो । सेप्टेम्बरमा नामिबियामा आइसिसी विश्वकप लिग–२ त्रिकोणात्मक सिरिजको प्रस्तावको चर्चा चलेपनि क्यानले औपचारिक पुष्टि गरेको थिएन ।
क्यानले दुई महिनापछि अन्तर्राष्ट्रिय प्रतियोगिता र खेल नभएमा घरेलु क्रिकेटमा जोड दिने बताएको छ । विदेशी प्रशिक्षकको लागि पनि पहल जारी राख्ने जनाएको छ । नेपालले यस वर्ष खेल्ने तालिका रहेका विश्वकप लिग–२ का तीन त्रिकोणात्मक सिरिज स्थगित भएसँगै यो वर्ष अन्तर्राष्ट्रिय प्रतियोगिता र खेलको सम्भावना कम रहेको छ । डिसेम्बरमा बंगलादेशमा इमर्जिङ टिम्स एसिया कप एक दिवसिय खेल्न बाँकी छ ।
