२७ साउन, काठमाडौँ ।
रुसले कोरोना भाइरस विरुद्धको विश्वकै पहिलो खोप तयार पारेको दाबी गरेको छ । मंगलबार रुसी राष्ट्रपति भ्लादमिर पुटिनले कोरोना विरुद्ध संसारको पहिलो खोपको सफल परीक्षण भएर मान्यता दिइएको बताएका हुन् । रुसको गामालिया रिसर्च सेन्टरले बनाएको उक्त भ्याक्सिनलाई रुसको स्वास्थ्य मन्त्रालयले मान्यता दिएको हो ।
पुटिनले खोपको सफल परीक्षण भइसकेको र कोरोना विरुद्ध लड्नका लागि रोग प्रतिरोधात्मक क्षमता पनि विकास गरेको दाबी गरेका छन् । खोपबारे मंगलबार मस्कोमा सरकारका मन्त्रीहरुलाई जानकारी दिँदै पुटिनले यो भ्याक्सिन आफ्नै छोरीमा समेत प्रयोग गरिएको बताएको बीबीसीले जनाएको छ ।
पुटिनले कोरोना भाइरसको खोप कार्यक्रमका लागि आवश्यक बजेट तर्जुमा गर्न सरकारलाई निर्देशन दिइसकेका छन् । उनले करिब ६० प्रतिशत रुसी नागरिकलाई फ्लुविरुद्धको खोप लगाइसक्नुपर्ने समेत बताएका छन् ।
त्यस्तै गामालिया रिसर्च सेन्टराका प्रमुख एलेक्जेन्टर गिन्चबर्गल उक्त खोप एडिनोभाइरससँग आधार भएर तयार गरिएको र खोपमा कोभिड–१९का मृत तत्व रहेको र यिनीहरु वृद्धि हुन नसक्ने बताएका छन् ।
तर, विज्ञहरुले भने यो भ्याक्सिनबारे प्रश्न पनि उठाएका छन् । यस्तै विश्व स्वास्थ्य संगठन (डब्ल्युएचओ) ले क्लिनिकल टेस्टको तेस्रो चरणमा पुगेका भनेको ६ वटा भ्याक्सिनमा यो नपरेको पनि बीबीसीले उल्लेख गरेको छ ।
रुसमा हालसम्म ८ लाख ९१ हजार मानिसहरुमा कोरोना संक्रमण देखिसकेको छ । चीनको वुहान सहरबाट सन् २०१९को अन्तिमदेखि फैलन सुरु गरेको कोरोना भाइरस हालसम्म विश्वको १ सय ८८ भन्दा मुलुकहरुमा देखा परिसकेको छ ।
कोरोनाका सबैभन्दा बढी संक्रमित क्रमशस् अमेरिका, ब्राजिल र भारतमा रहेको जोन हप्किन्स विश्वविद्यालयले उल्लेख गरेको छ । अरु देशका खोपहरुले परीक्षणका विभिन्न चरणहरु पार गरिरहेका बेला रुसले भने खोप बनाईसकेको दाबी गरेको हो ।
