नितेश यादव
१४ भदौ, जनकपुरधाम ।
प्रदेश नम्बर २ कोरोना महामारीको हटस्पट बनेको छ । जहाँ देशभरकै सबैभन्दा बढी संक्रमित छन् । प्रदेशका विभिन्न जिल्लामा संक्रमण नियन्त्रण बाहिर गएपछि लकडाउन तथा निषेधाज्ञा पनि थप हुँदै गएको छ।
धनुषामा पुनःनिषेधाज्ञा थप गर्ने निर्णय गरिएको छ ।आइतबार जिल्ला प्रशासन कार्यालय धनुषाले पुनः एक हप्ता निषेधाज्ञा थपगर्ने निर्णय गरेको हो । धनुषाका प्रमुख जिल्ला अधिकारी प्रेमप्रसाद भट्टराईका अनुसार जिल्लाभर कोरोना संक्रमणको जोखिम बढ्दै गएको र समुदायस्तरमा फैलिएकाले निषेधाज्ञाको समयअवधि आइतबार सकिन लाग्दा पुनःभदौ २१ गतेसम्मका लागि थप गरिएको छ ।
निषेधाज्ञा अवधिमा व्यापारी बिहान ६ बजेदेखि दिउँसो १२ बजेसम्म सुरक्षा सर्तकता अपनाई पसल सञ्चालन गर्न सकिनेछ । कोरोना संक्रमण रोकथाम तथा नियन्त्रण र यसको संक्रमण फैलिन नदिनका लागि जिल्ला भरी प्रतिकूल असर पर्न सक्ने कुनै किसिमको गतिविधि हुन र गर्न नदिन नेपाल राजपत्रमा तोकिएको अत्यावश्यक सेवाहरु बाहेकका अन्य सबै सेवा र स्थलहरु बन्द गर्ने गरि निर्णय भएको छ ।
