२५ भदौ, काठमाडौं ।
सरकारले दैनिक ८ सय जना मात्रै विदेशबाट यात्रु ल्याउन पाउने गरी तय गरेको कोटा हटाएको छ । कोटा हटाएर नियमित उडान सुरु भएका मुलुकबाट एयरलाइन्सले चाहे अनुसार नै यात्रु ल्याउन दिइने संस्कृति, पर्यटन तथा नागरिक उड्डयन मन्त्री योगेश भट्टराईले जानकारी दिएका छन् ।
उपप्रधान, परराष्ट्र, पर्यटन र श्रममन्त्रीबीच भएको छलफलपछि प्रधानमन्त्री र उपप्रधानमन्त्री सहभागी उच्चस्तरीय परामर्शबाट अन्तर्राष्ट्रिय उडानको संख्या थप गर्ने समझदारी भएको मन्त्री भट्टराईले बताएका छन् ।
योसँगै सरकारले खोलेको अन्तर्राष्ट्रिय व्यवसायिक (नियमित)उडानतर्फ एयरलाइन्सले अनुमति मागेमा थप उडानको अनुमति पाउने भएका छन् । उनका अनुसार अब पीसीआर नेगेटिभ भएका मात्र यात्रु ल्याउने गरी नियमित उडान खुला भएको मुलुकमा अब एयरलाइन्सले थप अनुमति मागेमा मन्त्रालयले उडानको अनुमति दिने भएको छ । हालको पीसीआर र क्वारिन्टिनसम्बन्धी नियमलाई यथावत राखेर कोटा हटाइएको हो । कम्पनीले आफ्नै खर्चमा कामदारलाई नेपाल फर्काउन चाहेमा प्राथमिकतामा राखेर उडान अनुमति दिइने छ। सँगै कल्याणकारी कोषबाट उद्धार गर्नुपर्ने अवस्थाका लागि श्रम मन्त्रालयले सम्बन्धित देशको नियोगसँगको समन्वयमा उडान गर्न सक्ने छ।
उनका अनुसार नियमति उडान भएका मुलुकमा पीसीआर नेगेटिभ भएका यात्रुका लागि समेत माग आएमा उडान थप गर्न सकिने गरी निर्णय भएको छ । मन्त्री भट्टराईले सामाजिक सञ्जाल फेसबुकमार्फत यसको जानकारी दिँदै लेखेका छन् –‘ बिदेशी भुमीमा अप्ठ्यारो अवस्थामा रहनु भएका नेपाली दिदिबहिनी तथा दाजुभाईप्रति सरकार संबेदनशील छ । वहाँको स्वदेश फिर्तीका लागि सरकारले सक्दो कोशीस गरिरहेको छ र सरकारले आफ्नो प्रयत्न बढाउदै लानेछ । अत्यन्तै प्रतिकुलतामा पनि धैर्य र संम्यमका लागि सबै दिदिबहिनी, दाजुभाईमा आभार ब्यक्त गर्दछु ।’
