४ असोज, विराटनगर । प्रदेश १ का १ सय विद्यालयमा पहिलोपटक डिजिटल साक्षरता अभियानको सुरुवात गरेको प्रदेश १ सरकारले प्रदेशलाई सडक मानवमुक्त प्रदेश बनाउने महत्वपूर्ण अभियानको थालनी गरेको छ ।
शनिबार विराटनगर–३ मदननगर टोलबाट एक महिलाको उद्धार गरी सामाजिक विकास मन्त्री जीवन घिमिरेले अभियानको थालनी गरेका हुन । विसं २०४३ सालमा हस्तबहादुर कार्की सँग वैवाहिक जीवनमा बाँधिएकी ४५ वर्षीया लिला कार्र्की २०४७ सालबाट नै मानसिक समस्यामा परिन । उनको उपचारका लागि परिवारले ५÷६ वर्षसम्म विभिन्न ठाउँ डुलाएपनि २० को १९ भएन ।
२ छोरा र एक छोरीकी आमा समेत रहेकी कार्कीको मानसिक सन्तुलन गुमेपछि गाँस र बासको समेत टुङ्गो नभएको श्रीमान हस्तबहादुर कार्की बताउँछन् । उद्धार गरेर कार्कीलाई विराटनगर– १० मा रहेको मानव सेवा आश्रम तीनटोलियामा लगेपछि अब उनको उपचार तथा खान बस्नको सम्पूर्ण प्रबन्ध आश्रमले गर्नेछ ।
परिवार नभएका र विचल्लीमा परेकाहरुलाई परिवारको जस्तो वातावरणमा राखिने आश्रमका सेवक नवराज केसी बताउँछन् । सडक मानवमुक्त प्रदेश बनाउन प्रदेश सरकार र विराटनगर महानगरपालिकाले सक्दो सहयोग गरिरहेको उनको भनाई छ ।
सडक मानवरहित प्रदेश बनाउन प्रदेश सरकारको निति तथा कार्यक्रम अनुरुप काम थालनी गरिएको मन्त्री घिमिरेले बताए । उनले केही समयमै प्रदेश एकलाई सडक मानवरहित प्रदेश बनाईने बताउँदै वेवारिसे ढंगबाट कसैले पनि सडकमा बस्नुपर्ने बाध्यता नआउने बताए । मानसिक रोगी महिलाहरु विभिन्न हिंसाका शिकार बन्नेगरेको पाईएकोले पहिलो चरणमा मानसिक रोगी महिलाको उद्धार गरिने उनको भनाई छ ।
प्रदेश सरकारले यसअघि पनि सामूहिक बलात्कारको शिकार भएकी भोजपुरकी एक महिलालाई शिशुसहित उद्धार गरी आश्रममा ल्याएको थियो । यस किसिमका व्यक्तिहरुको तथ्यांक संकलन भईरहेको र चाँडै कार्ययोजना बनाएर अगाडि बढ्ने प्रदेश सरकारले जनाएको छ ।
सडक मानवरहित बनाउने प्रदेश सरकारको यो योजना प्रशंसनीय र उदाहरणीय छ । यसमा हामी सवै प्रदेशवासीले सहयोग गर्न जररी छ । साथै यसको प्रभाकारी कार्यान्वयन्का लागि समेत हामीले खबरदारी गर्नुपर्ने देखिन्छ ।
