धनगढी : केराउ तस्करीमा संलग्न व्यक्तिहरूले दुई प्रहरीको हत्या गरेको पाइएको छ। जुगेडा अस्थायी प्रहरी पोस्टका असइ गोविन्द विक र जवान रामबहादुर साउदको शनिबार राति हत्या भएको अनुसन्धानबाट खुलेको हो। असइ विकको शव आइतबार कैलालीको धनगढी उपमहानगरपालिका–१० स्थित मोहना नदीमा भेटिएको थियो। जवान साउदको शव पनि नेपाल–भारत सीमा भएर बग्ने मोहना नदीमै मंगलबार बिहान भेटिएको हो।
‘चार डल्लबमा केराउ (मटर) आइरहेको सूचनाका आधारमा असइ विक र जवान साउद शनिबार राति ७ बजे खाना खाएर सिमानातिर लागे’, कैलालीका प्रहरी प्रवक्ता डीएसपी प्रतीक विष्टले भने, ‘उनीहरूले तस्करीको सामान साढे तीन घण्टा ढुकेको देखिन्छ।’
अनुसन्धानमा खटिएका एक प्रहरी अधिकृतका अनुसार केराउ भरिएका चारवटा डल्लब नियन्त्रणमा लिई चौकी ल्याउने बेला फरुवा बोकेर आएकाहरूले आक्रमण गरेको खुलेको छ। ‘उक्त घटनामा फरुवासहितका घरेलु हतियार प्रयोग गरिएको छ’, ती अनुसन्धान अधिकृतले भने। असइ विकसँग रहेको हतियार मंगलबार घटनास्थलमै फेला परेको प्रहरीले जनाएको छ।
अहिले भियतनामबाट नेपाल आयात गरिएको केराउ भारततर्फ तस्करी हुने गरेको छ। भारतमा केराउ (मटर) किलोको मूल्य ७० भारु (नेरु ११२) पर्छ। नेपालमा उक्त केराउ ६५ रुपैयाँ किलोमा पाइन्छ। तेस्रो मुलुकबाट आयात गरिएको सामान निर्यात गर्न नपाउने नियमअनुसार प्रहरी सीमा क्षेत्रमा केराउ तस्करी रोक्न गएको थियो।
घटनास्थलमा प्रहरीको स्लिपिङ ब्याग पनि रूखको हाँगामा टाँगिएको फेला परेपछि प्रहरीले दुवै जना तस्करको पर्खाइमा रहेको अनुमान गरेको छ। प्रहरीले उक्त घटनामा पक्राउ परेका १३ जनामध्ये ७ जनालाई मंगलबार सार्वजनिक गरेको छ। ती अभियुक्तमा धनगढी–१० का ३१ वर्षका पर्कु भनिने रोहित राना, २० वर्षका राजेन्द्र राना, चोर भनिने ३० वर्षका सुरेश राना, गब्बर भनिने २५ वर्षका राजकुमार राना, २२ वर्षका राम निवास राना, २९ वर्षका टल्लु भनिने दलराम राना र २५ वर्षका गोपाल राना छन्।
उनीहरूकै बयानका आधारमा मंगलबार घटनास्थलनजिकै मोहना नदीबीच बालुवामा गाडिएको अवस्थामा जवान साउदको शव फेला परेको हो। एक अनुसन्धान अधिकृतका अनुसार घटनामा अरू पनि संलग्न देखिएका छन्। उनीहरूको खोजी भइरहेको उनले बताए।
जुगेडा क्षेत्र तस्करीको ‘ट्रान्जिट’का रूपमा देखिएको छ। सशस्त्र प्रहरीका एक जवान पनि दुई महिनाअघि सोही क्षेत्रमा मृत फेला परेका थिए। त्यहाँबाट तस्करी हुने थाहा पाए पनि वडा नम्बर १२ स्थित अस्थायी प्रहरी चौकीमा ७ जना मात्र जनशक्ति खटाइएको छ।
निडर थिए विक
असइ गोविन्द विकको परिवार कञ्चनपुरको पुनर्बास नगरपालिका–९ स्थित सुकुम्बासी बस्तीमा बस्छ। दाजु रमेश, भाइ नरेश, आमा कलावतीसहित परिवारका लागि गोविन्द मेरुदण्ड थिए। सानै उमेरदेखि इमानदार स्वभावका गोविन्द पढ्नमा अब्बल थिए। ६ वर्षको उमेरमा बुवा अमर विकको निधन भएपछि गोविन्दको काँधमा परिवारको जिम्मेवारी थियो। जेठो दाजुले पढाइ अगाडि बढाउन नसकेपछि गोविन्दले बीबीएसम्म अध्ययन गरेका थिए।
‘सुकुम्बासी बस्ती, कमाइ खाने जग्गा थिएन। आम्दानीको स्रोत भनेको भारतको दुधवा नेसनल पार्कको दाउरा मात्रै। आमाले दाउरा र त्यस दाउराको कोइला बेचेर उनलाई पढाएकी हुन्’, गोविन्दका मीतभाइ पर्ने सन्तोष भट्टले भने।
गोविन्दको घर भारतको दुधवा नेसनल पार्कसँग जोडिएको ऐलानी जग्गामा छ। भारतको सम्पुर्णानगरका व्यापारीलाई कोइला बेचेर आमाले उनलाई पढाएकी हुन्। कोइला इँटा भट्टामा प्रयोग हुने गर्छ। ‘सुकुम्बासी परिवारको युवा खुला प्रतिस्पर्धाबाट सीधै असइमा भर्ना भएका थिए’, भट्टले भने, ‘केराउले परिवारकै खुसी खोसेर लग्यो।’
गोविन्दले २०७४ सालमा असइमा नाम निकाले। चितवनमा तालिम सकाएका उनको पहिलो पोस्टिङ कर्णाली प्रदेशको राजधानी सुर्खेतमा भयो। सुर्खेतका तीन–चार प्रहरी चौकीमा काम गरेर उनी कैलाली आएका हुन। कैलालीको सशस्त्र प्रहरी गण मुख्यालयमा दरबन्दी रहेका उनलाई ‘एक्टिभ प्रहरी’ भएकाले जुगेडा खटाइएको थियो।
‘कसैसँग डराउन पनि डराउँथेन। निडर थियो। बिगार्ने पनि कसैको होइन। इमानदार भएकै कारण उसको ज्यान गयो’, भट्टले भने।,याे समाचार अन्नपूर्ण पाेस्ट दैनिकमा छापिएकाे छ ।
