२८ कात्तिक, जनकपुर । धनुषामा कार अनियन्त्रित भएर नहरमा खस्दा चालकको मृत्यु भएको छ ।
शुक्रबार बिहान जनकपुरधामको मुजेलियामा पुलबाट बा २० च ६८३१ नम्बरको कार नहरमा खस्दा धनुषाधाम नगरपालिका(१९ का ४५ वर्षीय विजय शर्माको मृत्यु भएको धनुषाका ट्राफिक प्रहरी प्रमुख नवराज न्यौपानेले जानकारी दिए।
कार चालक अपांग रहेको र उनको लापरबाहीको कारण दुर्घटना भएको प्रहरीले जनाएको छ।
चालकको बायाँ हात प्यारालाइज्ड थियो । ट्राफिक प्रमुख न्यौपानेका अनुसार कार पुलनजिक आइसकेको समयमा फोन आएको र त्यही क्रममा गाडी नियन्त्रण गर्न नसकेपछि दुर्घटना भएको हो ।
दुर्घटनामा गम्भीर घाइते भएका शर्माको प्रादेशिक अस्पताल जनकपुर पुग्नासाथ डाक्टरले उनलाई मृत घोषणा गरेका थिए।
उनको शव अहिले पोष्टमार्टमका लागि अस्पतालमा राखिएको छ। गाडीमा चालकमात्रै थिए।
