विराटनगर,जेठ १७
जिल्ला प्रहरी कार्यालय मोरङले सर्वसाधारण सेवाग्राहीसँग घूस लिने प्रहरीको फोटो सहितको विवरण प्रहरी कार्यालयको सुचना पाटीमा राख्ने भएको छ ।
मोरङ प्रहरीले घुस लिनेलाई विभागीय कार्बाहीमात्रै गर्ने परम्परा तोड्दै यस्तो अभियान सञ्चालन गरेको हो ।
मोरङ प्रहरी प्रमुख एसपी मनोजकुमार केसीले प्रहरीले पैसाकै लोभमा परेर कतिपय अवैध कामलाई पनि सहयोग गर्ने गरेको र अपराधिक घटनामा समेत मिलेमतो गर्ने गरेको पाइएपछि थप कडाई थालिएको जानकारी दिए।उनले भने ‘कोही कसैसँग जुनसुकै प्रहरी कर्मचारीले घूस लिए पनि कारबाही हुन्छ,।’
कारबाहीका साथै पैसा लिने प्रहरीको फोटोसहितको सबै विवरण सूचना पाटीमा राखेर सार्वजनिक गरिने जानकारी समेत केसीले दिए ।
प्रहरीले शून्य सहनशीलतामा काम गर्ने र राज्यले दिएको तलबलगायतका सुविधा बाहेकमा लोभ गर्न नहुने उनले बताए ।
केसीले राजमार्गमा हुने अवैध गतिविधि, सीमा अपराध, गुण्डागर्दी, तस्करी र प्राकृतिक स्रोतमाथिको दोहन नियन्त्रणमा प्रहरी सक्रिय भएर लागेको जानकारी दिए।
विराटनगर महानगरपालिका प्रदेश १ को अस्थायी राजधानी भएका कारण पनि महानगरको शान्ति सुरक्षाका सवालमा प्रहरी गम्भीर रहेको केसीको भनाइ छ। त्यसका लागि विकृति र विसंगती रहित सुरक्षित महानगरको परिकल्पनासहितको सुरक्षा रणनीति तयार पारिएको जानकारी उनले दिए।
