२९ पुस, काठमाडौँ ।
प्रधानन्यायाधीश चोलेन्द्र शम्शेर राणाले संवैधानिक इजलासले संविधानका सम्पूर्ण धाराको व्याख्या गर्ने बताएका छन् ।
संवैधानिक इजलासमा बृहत् पूर्ण इजलासको माग गर्ने अधिवक्ताहरुलाई उनले संविधानका सबै व्याख्या संवैधानिक इजलासले गर्ने बताएका हुन्। संवैधानिक इजालस विगतको विशेष इजलास जस्तै भएको र यसलेनै संविधानको सम्पूर्ण व्याख्या गर्ने तर्क गरेका हुन् ।
‘हिजोको विशेष इजलासले जे गर्थ्यो संवैधानिक इजलासले त्यही गर्छ हामी त्यही बमोजिम रिट निवेदन हेरिरहेका छौँ। संवैधानिक इजलासमा पठाउने निर्णयमा अन्य धारा उल्लेख भएनन् भन्ने तपाइँहरुको तर्क छ यस इजलासमा संविधानका सम्पूर्ण धाराका व्याख्या हुन्छ,’ उनले भने ।
प्रतिनिधिसभा विघटन सम्बन्धी सर्वोच्चमा १३ वटा रिटन निवेदन परेका छन्। ती रिटमाथि वृहत पूर्ण इजलासमा छलफल हुनुपर्ने प्रतिनिधिसभा विघटनविरुद्ध बहस गरिरहेका अधिवक्ताहरुले माग गरेका छन्।
यता सरकारी पक्षले भने वृहत पूर्ण इजलासमा पठाउन आवश्यक नभएको तर्क गरेको छ ।
