काठमाडौं : नेकपाको आधिकारिकताको विवादको सम्बन्धमा केपी शर्मा ओली र पुष्पकमल दाहाल ‘प्रचण्ड’–माधवकुमार नेपाल पक्षले पठाएको जवाफबारे निर्वाचन आयोगले अध्ययन गरिरहेको छ । आयोगका अनुसार दुवै पक्षले पठाएको पत्र आयोगको कानुन तथा राजनीतिक दल महाशाखाका कर्मचारीहरूले अध्ययन गरिरहेका छन् ।
१० दिन बितिसक्दा पनि आयोग अझै अध्ययनमै केन्द्रित रहेपछि विवाद निरुपण समयावधि अझै लम्बिने देखिएको छ । यसबारे कसरी अघि बढ्ने भन्ने विषयमा आयुक्तहरुबीच छलफल हुन बाँकी नै रहेको छ । नेकपाको दुवै पक्षले पार्टीमा गरेको हेरफेरको विवरण अद्यावधिका लागि दिएको निवेदनको थप स्पष्टताको माग गर्दै आयोगले पुस २३ मा दुवै पक्षलाई ७ दिनको समय दिएर पत्र पठाएको थियो । दुवै पक्षले पुस २९ गते आयोगमा जवाफ पठाएका थिए ।
नेकपाको दुवै पक्षबाट आएका जवाफको अध्ययन र जाँचबुझ भइरहेको प्रमुख निर्वाचन आयुक्त दिनेश थपलियाले बताउनुभयो । ‘पार्टीमा हेरफेर गरेर अद्यावधिक गर्न दिएको विषय संविधान, ऐन, नियम र दलको विधानबमोजिम भएनभएको विषयमा अध्ययन भइरहेको छ । यसबारे चाँडोभन्दा चाँडो निर्णय गरेर टुंग्याउनेछौं।’ –उहाँले भन्नुभयो । नेकपाको आधिकारिकताको विवादका सम्बन्धमा प्रधानमन्त्री ओली र ‘प्रचण्ड’–माधव पक्षले आफूहरु आधिकारिक रहेको दाबी गरिरहेका छन् । यसले गर्दा आयोगले कानुनी प्रक्रियाअनुरुप विवाद निरुपण गर्ने प्रक्रियामा जान कठिनाइ भइरहेको हो ।,यो खबर आजको राधानी दैनिकमा छापिएको छ ।
