२७ साउन ,विराटनगर ।
स्कोडाको बहुप्रतिक्षित एसयूभी स्कोडा कुशाक विराटनगरमा आएको छ । नेपालका लागि स्कोडाको आधिकारिक विक्रेता एमएडब्लु इन्टरप्राइजेजले एसयुभी स्कोडा कुशाक बजारमा ल्याएको हो । विराटनगरमा पनि स्कोडाको आधिकारिक विक्रेता सुपेरियर मोर्टसले एसयूभी स्कोडा कुशाकको लन्च गरेको छ । बुधबार एक कार्यक्रम गरी उक्त एसयुभी लन्च गरेको हो ।
यो पाँच सिट भएको एसयुभी हो जसका विशेषता र क्षमताले गर्दा नेपाली बजारका लागि प्रतिक्षित गाडी बनेको छ। एक्टिभ, एम्बिसन र स्टाइल गरी तीन भेरियन्टमा उपलब्ध कुशाकले वल्र्ड प्रिमियर भएदेखि नै अटो जगतमा दमदार उपस्थिति जनाइसकेको छ । कुशाक स्कोडाको इन्डिया २.० प्रोजेक्ट अन्तर्गत सार्वजनिक गरिएको पहिलो एसयुभी हो । स्कोडा एमएडब्लुका कार्यकारी निर्देशक रौनक अग्रवालका अनुसार नेपालमा १.० लिटरको टिएसआई पेट्रोल इन्जिन भएका कुशाक भित्रनेछन् । टीएसआई इन्जिन बहुप्रतिक्षित इन्टरनेशनल इन्जिन अवार्ड हासिल गर्न सफल इन्जिन हो । उक्त अवार्डलाई अटोमोबाइल क्षेत्रका ओस्कार जस्तै मानिन्छ । यो इन्जिनले ११५ बीएचपी पावर र १७ ८ एनएम टर्क उत्पन्न गर्छ जुन बेस्ट इन क्लास हो । टीएसआई इन्जिन म्यानुअल र अटोमेटिक दुवैमा उपलब्ध हुनेछ ।
कुशाकमा टु–स्पोक स्टेरिङ ह्विल, इलेक्ट्रिक सनरुफ, भेन्टिलेटेड फ्रन्ट सिट, डुअल जोन क्लाइमेट कन्ट्रोल, वायरलेस फोन चार्जिङ, टच स्क्रिन इन्फोटेनमेन्ट सिस्टम, मल्टिफंसन स्टेरिङ, हिल्ड होल्ड कन्ट्रोल, कि–लेस इन्ट्री स्टार्ट र एक्जिट सिस्टमलगायत विशेषता छन् । यसमा सुरक्षाका लागि छ वटा एअरब्याग, रियर पार्किङ क्यामरा, आइसोफिक्स चाइल्ड सिट माउन्ट, अटो हेडल्याम्प एन्ड वाइपर, मल्टिकोलिजन ब्रेकिङ सिस्टम पनि छ। गाडीमा फ्रन्ट डिस्क ब्रेक र रियर ड्रम ब्रेक छ।
स्कोडा कुशाकको सुरुवाती भेरिएन्ट एक्टिभ म्यानुअल ट्रान्समिसनको मूल्य ४९ लाख ९० हजार रुपैयाँ तोकिएको छ । त्यसैगरी एम्बिसन म्यानुअल ट्रान्समिसनको मूल्य ५३ लाख ९० हजार , अटोमेटिक ट्रान्समिसनको ५८ लाख ९० हजार, स्टाइल म्यानुअल ट्रान्समिसनको ६० लाख ९० हजार र अटोमेटिक ट्रान्समिसनको ६५ लाख ९० हजार रुपैयाँ मुल्य तोकिएको कम्पनीले जनाएको छ । नेपाली बजारमा स्कोडा कुशाक क्यान्डी ह्वाइट, ब्रिलियन्ट सिल्भर, कार्बन स्टिल, हनी ओरेन्ज र टोर्नाडो रेड गरी पाँच रङ उपलब्ध हुने कम्पनीले जनाएको छ ।
कार्यक्रममा कुशाक अर्डर गरी खरिद गर्ने क्रेताहरुलाई चाबी हस्तान्तरण समेत गरिएको सुपेरियर मोटर्सका म्यानेजिङ डायरेक्टर अलि अस्गर मियाँले जानकारी दिए । साउन १० गते आधिकारिक विक्रेता एमएडब्लु इन्टरप्राइजेजले उक्त एसयूभी लन्च गरेको थियो । उपत्यका बाहिर र भित्र गरी हालसम्म ७५ वटा विक्री भइसकेको र १५३ वटा बुकिङ भईसकेको कम्पनीले जनाएको छ ।
