३० साउन, काठमाडौँ ।
बैंकिङ कसुरमा इन्टरपोलको ‘रेड कर्नर नोटिस’ मा परेका अभियुक्त केदार ढुंगानालाई पोर्चुगलबाट नेपाल ल्याइएको छ । केन्द्रीय अनुसन्धान ब्युरो (सीआईबी) र इन्टरपोलको सहकार्यमा काभ्रे भुम्लु गाउँपालिका–१ का ४३ वर्षीय ढुंगानालाई पोर्चुगलबाट आज काठमाडौं ल्याइएको प्रहरी प्रवक्ता, एसएसपी बसन्तबहादुर कुवरले जानकारी दिए ।
ढुंगानालाई काठमाडौं ल्याएलगत्तै हिरासतमा राखिएको र भोलि अदालत खुलेपछि पेश गर्ने उनले बताए । उनीसहित १२ जनामाथि देव विकास बैंकबाट कीर्ते कागजात बनाएर दुई करोड ७१ लाख ७६ हजार रुपैयाँ कर्जा लिएर हिनामिना गरेको अभियोग छ । उनीविरुद्ध जिल्ला अदालत काठमाडौंमा र ललितपुर जिल्ला अदालतमा मुद्दा दर्ता भएका छन् ।
ललितपुर अदालतमा परेका १० वटा मुद्दामा उनलाई १ वर्ष कैद र ७० हजार जरिवाना तोकिएको छ । उनीविरुद्ध ४ पुस २०७५ मा प्रहरीले पक्राउ पुर्जी जारी गरेकोमा नेपालमा नरहेको पाइएपछि १७ पुस २०७५ डिफ्युजन नोटिस जारी गरिएको थियो । त्यसपछि पनि नभेटिएपछि १ वैशाखमा इन्टरपोलले रेड नोटिस जारी गरेको थियो ।
ढुङ्गानाले देवः विकास बैंक ठगी गरेर २ करोड भन्दा बढी रुपैयाँ लिएका थिए । त्यस्तै, अन्य मानिससँग पनि लाखौं रुपैयाँ ठगी गरेको उजुरी परेको थियो । फरार रहेका ढुङ्गाना युरोपमा व्यापार गरेर बसेको खुलेपछि प्रहरीले इन्टरपोलको सहयोगमा नियन्त्रणमा लिएको हो । उनी त्यहाँ बिजनेस भिसामा पुगेका थिए।
