१९ भदाै, ढाका ।
बङ्गलादेशमा लामो समयदेखि बन्द रहेको विद्यालय तथा क्याम्पस आगामी सेप्टेम्बर १२ देखि पूनःसञ्चालन गरिने भएको छ ।
बङ्गलादेश सरकारले विद्यालय तथा क्याम्पस पूनःसञ्चालन गर्ने घोषणा गर्दै त्यसका लागि तयारीसमेत गर्न सरोकारवाला सबैलाई आह्वान गरेको छ ।
कोरोना भाइरसको महामारीका कारण बन्द भएका विद्यालय तथा क्याम्पस झन्डै १८ महिनापछि पुनः सञ्चालन हुने भएको अधिकारीले जनाएका छन् ।
बङ्गलादेशका शिक्षा मन्त्री दिनु मोनाले विद्यालय खुल्ला गरिए पनि सबै विद्यार्थीको पठनपाठन भने अहिले नै नहुने स्पष्ट पारिन् । उनले शुक्रवार दिएको जानकारीअनुसार सुरुमा परीक्षा आउन लागेका विद्यार्थीको मात्रै पठन पाठन सुचारु गरिने भएको हो ।
अन्य विद्यार्थीलाई भने भिडभाड नहुने गरी हप्तामा एक÷दुई दिन पढाउने गरी व्यवस्था गर्न लागिएको पनि शिक्षा मन्त्री मोनाले जानकारी दिइन् ।
उनले पढाइ हुने दिनको सङ्ख्या भने कोरोनाभाइरसको महामारीको अवस्था हेरेर बढाउँदै लैजान सकिने पनि बताइन् । बङ्गलादेश सरकारले विश्वविद्यालय भने यसअघि अक्टोबर १५ देखि नै सञ्चलन गर्ने निर्णय गरेको थियो ।
बङ्गलादेशमा अघिल्लो वर्षको मार्चदेखि महामारी धेरै फैलिएको भन्दै विद्यालय बन्द गरिएको थियो । बन्द गर्ने म्याद थप्दै थप्दै यही सेप्टेम्बर ११ सम्म पुगेको छ । अव भने बन्द गर्ने म्याद नथपिने भएकाले सेप्टेम्बर १२ देखि विद्यालय खुल्ला हुने भएका हुन ।
बङ्गलादेशमा कोरोनाभाइरसका कारण अहिलेसम्म १५ लाख १० हजार २८३ जना सङ्क्रमित भएका छन् भनेतीमध्ये २६ हजार ४३२ जनाको मृत्यु भएको छ । रासस÷सिन्ह्वा
