३१ भदाै, काठमाडाैँ ।
इन्टरनेट सेवाप्रदायक संघ (आईस्पान)ले इन्टरनेटको शुल्क बढाउने भएकाे छ । नेपाल विद्युत प्राधिकरणले बढाएको पोल भाडा पुनरावलोकन गर्न नमानेपछि आइस्पानले इन्टरनेटको शुल्क बढाउने भएको हो ।
विद्युत प्राधिकरण र इन्टरनेट सेवाप्रदायक बीच पोलभाडा विवाद विगत तीन बर्षदेखि हुँदै आएको छ । प्राधिकरणका कार्यकारी निर्देशक कुलमान घिसिङ र उर्जामन्त्री पोलभाडा विवादमा पछि नहट्ने बताएपनि एक्कासी सेवाप्रदायकले शुल्क बढाउन बाध्य भएको आइस्पानका एक अघिकारीले बताए ।
उनका अनुसार उर्जा मन्त्री पम्फा भुसाललाई भेटर पोलभाडा विवाद मिलाउन आग्रह गरेपनि नमानेपछि सेवाप्रदायकले शुल्क बढाएका हुन ।आईस्पानका अध्यक्ष सुधीर पराजुलीका अनुसार यो निर्णयबाट करिब ९२देखि ९३ प्रतिशत तारसहितको इन्टरनेट सेवा लिइरहेका ग्राहकले बढी मूल्य तिर्नुपर्ने भएको छ ।
‘शहरी क्षेत्रमा प्रतिप्याकेज १५० रुपैयाँ र ग्रामीण क्षत्रेमा ३०० रुपैयाँ बढाउन कम्पनीहरुले नेपाल दूरसञ्चार प्राधिकरणका प्रस्ताव पेश गरेका छन्,’ पराजुली भन्छन्,’सरकारी निकायले पोलको भाडा बढाएपछि त्यसको मार उपभोक्तामाथि पर्ने भयो ।’
विद्युत प्राधिकरणले ५०० प्रतिशतसम्म बढाएको पोलभाडालाई लिएर आइस्पानले शुल्क बढाएको बताइएको छ । पराजुलीका अनुसार दूरसञ्चार प्राधिकरणले इन्टरनेटको अनुमति दिएलगत्तै शुल्क बढ्नेछ ।
