विराटनगर, असार ३२
विराटनगर महानगरपालिकाको मेनरोडमा यसअघि मोटरसाइकलमा लाग्दै आएको वान वे मंगलबारदेखि हट्ने भएको छ । जिल्ला ट्राफिक प्रहरी कार्यालयले सोमबार आफ्नै कार्यालयमा पत्रकार सम्मेलनको आयोजनागरि सो बिषयमा जानकारी दिएको हो ।
जिल्ला ट्राफिक प्रहरी प्रमुख शिवकुमार पोखरेलले यसअघि बुधहाटचोकदेखि जलजलाचोकसम्म मोटरसाइकलमा लाग्दै आएको एकतर्फी सवारी सञ्चालन नियम हटाइने बताए ।
उनले मंगलबारदेखि सो सडकको दुवैतर्फबाट मोटरसाइकलले ओहोरदोहोर गर्न पाउने बताए । प्रहरी निरीक्षक पोखरेलले दुइचक्के सवारीसाधनकालागि वान वे हटाइएपनि अन्य सवारीसाधनको हकमाभने पहिलाकै नियम कायम रहने बताए ।
मोटरसाइकलमा वान वे हटाइएसंगै सो सडकको दुवैतर्फ भोलीदेखि नै पार्किङ निषेध गरिएको समेत उनले जानकारी दिए । भोलीदेखि ट्राफिकचोकदेखि जलजलाचोकसम्म सडक छेउमा कुनैपनि सवारीसाधन पार्किङ गर्न नपाइने नियम बनाइएको छ ।
पार्किङकालागि मध्य बजारमा रहेको ए र बी प्लटका साथै नमस्कार होटल अगाडि रहेको खाली जग्गा छुट्टयाइएको जिल्ला ट्राफिकले जनाएको छ । यस्तै बसपार्कबाट छुटेको सार्वजनिक बस र बाहिरबाट आउने बसहरुले मंगलबारदेखी बसपार्क र बरगाछीमा मात्र रोक्न पाउने छन ।
महानगरको ट्राफिक ब्यवस्थापनगर्न स्कुल बसहरुले विद्यार्थी चढाउन र उतार्नकालागि समेत निश्चित स्थान तोक्न लागिएको ट्राफिक कार्यालयले जनाएको छ ।
