८ असोज, एजेन्सी ।
श्रीलंकामा कोभिडबिरुद्ध जडिबुटीयुक्त औषधी विकास गरेको दाबी गर्ने एक ‘डाक्टर’ को कोभिडकै कारण ज्यान गएको छ ।
६ महिनाअघि आफूले कोभिडको औषधी पत्ता लगाएको बताएपछि एलियान्था ह्वाइट श्रीलंकामा चर्चामा आएका थिए । उनले मह र जाइफल मिसाएर आर्युबेदिक औषधी तयार गरेका थिए ।
उनको औषधीलाई त्यहाँको स्वास्थ्य मन्त्रालयलेसमेत अनुमोदन गरेको थियो । त्यस्तै, उनको औषधीबाट भारतका खेलाडीको उपचार भएको दाबी गरिएको थियो ।
आफूलाई सपनामा देवताले जाईफल र महको औषधीले कोभिडले छुन नसक्ने उनले दाबी गरेका थिए । तर, उनको औषधी सेवन गरेकी स्वास्थ्यमन्त्री पभिथ्रा वान्निआरच्चीलाई नै कोभिड पोजेटिभ देखिएको थियो । पभिथ्रा दुई सातासम्म आईसीयूमा भर्ना भएकी थिइन् । उनले वर्तमान प्रधानमन्त्री महिन्दा राजापाक्षेलाई समेत कोभिड नियन्त्रणबारे सल्लाह दिन्थे ।
४८ वर्षीय ह्वाइटले खेलाडी र उच्च राजनीतिक नेतालाईसमेत औषधी दिएका थिए । आफूले विकास गरेको औषधीलाई नदीमा खन्याएमा श्रीलंका र छिमेकी भारतमा कोभिड महामारी अन्त्य हुन सक्ने उनले दाबी गरेका थिए ।
धेरै भारतीय क्रिकेटरलाई उपचार गरेको बताएपछि उनी पछिल्लो समय चर्चामा थिए । तर, उनको उपचार विधिलाई चिकित्सकहरुले अस्वीकार गरेका थिए । आफ्नो घुँडाको उपचार गरेपछि सन् २०१० मा क्रिकेट बादसाह सचिन तेन्डुलकरले उनलाई सार्वजनिक रुपमै धन्यवाद दिएका थिए ।
ह्वाईट यसै महिनाको सुरुमा कोभिड संक्रमणबाट बिरामी परेका थिए । तत्काल अस्पताल लगिएका उनको अवस्था नाजुक बनेको थियो । श्रीलंकामा कोभिडबाट अहिलेसम्म १२ हजार जनाको मृत्यु भइसकेको छ ।
