१५ मंसिर, काठमाडौं।
अर्थमन्त्री जनार्दन शर्माले मोबाइल फोन नेपालमै उत्पादन गर्न व्यवसायीहरुलाई आह्वान गरेका छन्।
आयातकर्ताहरुलाई सधैं बाहिरबाट ल्याएर बेच्नुको साटो उत्पादन प्लान्ट स्वदेशमै स्थापना गर्ने सम्भावनामा काम गर्न आग्रह गरेका हुन्। नेपाल मोबाइल वितरक संघको दोस्रो राष्ट्रिय महाधिवेशनलाई बुधबार काठमाडौंमा सम्बोधन गर्दै उनले मोबाइल उत्पादन प्लान्ट स्थापना गर्न सरकार आवश्यक सहजीकरण गर्न तयार रहेको बताए।
‘सामसङ मोबाइल चलाउँदै हुनुहुन्थ्यो (दीपक मल्होत्रा)। मैले वहाँलाई सोधें यसको उत्पादन नेपालमै गर्नुपर्यो, सामसङलाई यहाँ ल्याउनुस् न त। के कर छुट चाहियो गरौं न। सम्भव छ यो कुरा?,’ शर्माले भने।
यस्तै, अर्थमन्त्री शर्माले अवैध मोबाइलको आयात नियन्त्रण गर्न बहुप्रतिक्षित मोबाइल डिभाइस म्यानेजमेन्ट सिस्टम (एमडीएमएस) ले तत्काल लागू गर्न निर्देशन दिइसकेको बताएका छन्। नेपाल मोबाइल बितरक संघको दोस्रो राष्ट्रिय महाधिवेशनलाई सम्बोधन गर्दै शर्माले कोही कसैले भन्दैमा वा प्रभाव परेर एमडीएमएस कार्यान्वयन नरोकिने बताए।
‘एमडीएमएस तत्काल लागू हुन्छ। मैले यही कार्यक्रममार्फत् घोषणा गरें। अन्य निकायहरुमा जहाँ एमडीएमएस लागू गर्न कठिनाइ भइरहेको छ बरु त्यहाँ थप सक्रिय रुपमा छलफल गरेर समस्या भए समाधान गर्छु,’ मन्त्री शर्माले भने। यस्तै, विदेशबाट कतिवटासम्म मोबाइल ल्याउन दिने भन्ने बारेमा समस्या रहेको उनले बताए।
‘विदेश गएर ठूलो दुःख गरेर हाम्रो देश रेमिट्यान्सले चलिरहेको छ। तिनलाई एउटा मोबाइल ल्याउन नदिउँ अन्याय हुन्छ, दिनुपर्यो। एउटा ल्याउन दियो, त्यसको नाममा अरु थुप्रै आउँछ,’ शर्माले भने,‘न्यूनतम दिनुपर्ने व्यवस्था गरेर बीचमा अवैध धन्दा गर्न भने रोक्नुपर्ने छ।’
सञ्चार मन्त्रालय मातहतको नेपाल दूरसञ्चार प्राधिकरणले लामो समयदेखि लागू गर्न खोजेको एमडीएमएस अझै पूर्ण रुपमा लागू हुन सकेको छैन। त्यसैगरी, अर्थमन्त्री शर्माले मोबाइल रिफर्बिसमा रहेको समस्या समाधान गर्न तयार रहेको बताएका छन्।
दूरसञ्चार प्राधिकरणले मोबाइल सेटको एसेम्ब्ली तथा रिफर्बिस सम्बन्धमा गत साउन अन्तिम साता रेगुलेटरी फ्रेमवर्क सार्वजनिक गरेको थियो। मोबाइल सेटको एसेम्बलिङ गर्न उद्योगजन्य व्यवसायमार्फत् रोजगारी सिर्जना गर्न सहयोग पुग्ने उद्देश्यले प्राधिकरणले उक्त फ्रेमर्वक तयार पारेको छ।
प्राधिकरणका अनुसार उपयोगी डिभाइसहरुको आयु क्रमिक रूपमा बढाउने, विद्युतीय फोहोर उत्सर्जन घटाउने, डिभाइसको आयात निरुत्साहित गर्नेदेखि रोजगारी सिर्जना गर्न फ्रेमवर्क उपयोगी हुने जनाएको छ।
