८ चैत, दाङ । घोराही–तुलसीपुर चारलेन सडकका मजदुरले दुई वर्ष बितिसक्दा पनि काम गरेको ज्याला पाएनन् ।
घोराही–तुलसीपुरको २८ किलोमिटर चार लेन सडकको कपेटी ठेक्का लिएको अष्ट भैरव निर्माण सेवा कम्पनीमा काम गरेका ३ सय बढी मजदुरले दुई वर्षदेखि ज्याला नपाएको गुनासो गरेका छन् ।
तुलसीपुर–१८ का एक मजदुर तकमान घर्तीले ठेकेदार सम्पर्कविहीन भएपछि आफूले कामवापत पाउनुपर्ने ज्याला अहिलेसम्म नपाएको बताए ।
दुई वर्षयता उनीहरू ठेकेदार खोज्दै प्रहरी–प्रशासन धाइरहेका छन् । ‘गर्मी, धुलो केही नभनेर काम गरियो’ उनले भने, ‘ठेकेदारले पैसा दिन्छु भन्दै झुलायो । दूई वर्ष भइसक्यो, एक पैसा पाएको होइन ।’ उनले ०७६ सालको पुसदेखि फागुनसम्म काम गरेवापत ४३ हजार ज्याला पाउन बाँकी रहेको बताए ।
अष्ट भैरव निर्माण सेवा कम्पनीमा चार लेन सडक निर्माणको काम गरेका ३०० बढी मजदुरले २४ हजारदेखि ४५ हजारसम्म ज्याला पाउन बाँकी रहेका बताएका छन् ।
दुई वर्षदेखि ठेकेदार सम्पर्कविहीन हुने र पटक–पटक झुलाउँदै आएको पीडित श्रमिकले बताए । ज्याला नपाएको गुनासो लिएर प्रहरी पुग्दा पनि सुनुवाई नभएको उनीहरूले बताए ।
गुनासो सुनुवाई नभएपछि २८ बढी मजदुरले सामूहिक रुपमा ठेकेदार अनुप पाण्डेविरुद्ध प्रहरीमा ठगी मुद्दा दर्ता गर्ने तयारी गरेका छन् । आफूले काम गरेवाफतको ज्याला पाउनुपर्ने मजदुहरू बताउँछन् ।
यसअघि, चार लेन सडक निर्माणको जिम्मा लिएको अष्ट भैरव निर्माण कम्पनीका पाण्डेविरुद्ध जिल्ला प्रशासन कार्यालय र जिल्ला प्रहरी कार्यालयमा गरी विभिन्न संघसंस्था र कम्पनी गरी १७ वटा ठगीको उजुरी परेको छ ।
घोराही उपमहानगरपालिका–१५ भरतपुरका व्यवसायी गेहेन्द्र बस्नेतले निर्माण व्यवसायी पाण्डेले आफूसँग १ करोड ४४ लाख रुपैयाँ ठगी गरेको भन्दै प्रहरीमा उजुरी दिएपछि पाण्डे ११ दिनअघि प्रक्राउ परी हाल प्रहरी हिरासतमा छन् ।
चार लेन सडक निर्माण गर्नक्रममा आफ्नो सवारी साधन प्रयोग गरी भाडावापतको रकम एक करोड ४४ लाख १७ हजार ७७६ रुपैयाँ नदिएपछि व्यवसायी बस्नेतले पाण्डेविरुद्ध उजुरी दिएका थिए ।
पक्राउ परेका पाण्डे तुलसीपुर मेयर एवम् नेकपा एमालेका नेता घनश्याम पाण्डेका छोरा हुन् ।
