विराटनगर, ६ वैशाख । मोरङको लेटाङ घटनामा संलग्न कर्तव्य ज्यान मुद्दाका १० आरोपीलाई जिल्ला अदालत मोरङले मंगलबार जनही ५० हजार रुपैयाँ धरौटीमा रिहा गर्ने आदेश दिएको छ ।
न्यायाधीश शिशिरराज ढकालको इजलसले मंगलबार यस्तो आदेश दिएको हो । आरोपितलाई तत्काल र्पूपक्ष थुनामा राखेर अनुसन्धान गर्नुपर्ने मिसिल प्रमाणबाट नदेखिएको ठहर गर्दै न्यायाधीश ढकालको इजलासले धरौटीमा छाड्ने आदेश दिएको सूचना अधिकृत हेमबहादुर बुढाथाकीले जानकारी दिएका छन् ।
अदालतको आदेशसँगै कृष्ण विश्वकर्मा, डम्बरबहादुर कार्की, विशेष मगर, सन्तोश कुंवर, कुमार बहादुर खोक्रेल, कपिल नेपाली, समिर राई, मनकुमार महरा, अनिल विश्वकर्मा र लेखबहादुर मगर जनही ५० हजार धरौटीमा रिहा भएका छन् । उक्त मुद्दाका पाँच आरोपित अझै फरार छन् । त्यसैगरी उक्त घटनामा अभद्र व्यवहार गरेको अभियोगमा मुद्दा खेपेका १५ जना नाबालकलाई पनि न्यायाधीश ढकालको इजलासले अविभावकको जिम्मा लगाउने आदेश दिएको छ ।
लेटाङ ५ खेरुवास्थित शिक्षा माध्यामिक विद्यालयका शिक्षक मनोज पौडेलले कक्षा ६ मा अध्यनतर एक बालिकालाई यौन र्दूर्व्यवहार गरेपछि उनलाई नियन्त्रण गर्न पुगेको प्रहरी टोलीलाई उत्तेजित भीडले आक्रण गर्दा चैत ६ गते राति २६ वर्षीया महिला प्रहरी जवान उर्मिला श्रेष्ठको घटना स्थलमा मृत्यु भएको थियो ।
उक्त घटनामा संलग्न भएको भन्दै मोरङ प्रहरीले एक १४ वर्षीय नाबालकसहित १६ जना विरुद्ध आजन्म कैदको माग गर्दै गत बुधबार जिल्ला अदालतमा कर्तव्य ज्यान मुद्दा दर्ता गरेको थियो । प्रहरीले घटनामा ६७ जना प्रत्यक्ष रुपमा संलग्न भएको ठहर गर्दै ६२ जनालाई नियन्त्रणमा लिएर अनुसन्धान गरेको थियो ।
त्यसमध्ये एक नाबालकसहित १६ जना कर्तव्य ज्यानमा संलग्न भएको ठहर गर्दै आजन्म कैदको माग गर्दै कर्तव्य ज्यानमा मुद्दा दर्ता गरेको थियो । प्रहरीले ५१ जना विरुद्ध अभद्र व्यवहारमा मुद्दा चलाएको थियो ।
त्यसमध्ये १५ जना नाबालक थिए । चैत ६ गते आइतबार साँझ मोरङको लेटाङमा उत्तेजित भीडमा मारिएकी २६ वर्षीया प्रहरी जवान उर्मिला श्रेष्ठको मृत्यु गोली लागेर भएको पुष्टि भएपछि घटनाले थप मोड लिएको छ । श्रेष्ठलाई लागेको गोली प्रहरीको हो वा उत्तेजित भीडबाट पनि गोली चलेको थियो भन्ने पुष्टि हुन सकेको छैन ।
घटनामा प्रहरीले दुई दर्जन बढी हवाई फायर गरेको थियो । प्रहरीकै गोली लागेर प्रहरीकै मृत्यु भएको हो कि भन्ने आशंकामा मृतकको शरीरमा भेटिएको गोली र प्रहरीका हतियारका गोली विधि विज्ञान प्रयोगशालामा परीक्षण गर्दा मेल नखाएपछि भीडबाटै चलेको गोलीले श्रेष्ठको मुत्यु भएको पुष्टि भएको मोरङका प्रहरी प्रमुख एसपी शान्तीराज कोइरालाको भनाइ छ ।
घटनास्थलमा १० थान सट गनको खोका फेला पर्नुले भीडबाट पनि गोली चलेको पुष्टि हुने कोइरालाको भनाइ छ । छात्रामाथि यौन दुर्व्यवहारको आरोप लागेका शिक्षक मनोज पौडेललाई जिल्ला अदालत मोरङले पुर्पक्षका लागि थुनामा राख्ने आदेश दिएको छ । जिल्ला अदालतका न्यायाधीश दुर्गा खड्काको इजलासले पुर्पक्षका लागि थुनामा राख्ने आदेश दिएको हो ।
लेटाङ–५ खेरुवास्थित शिक्षा माध्यमिक विद्यालयका शिक्षक पौडेलले कक्षा ६ मा अध्ययनरत एक बालिकालाई यौन दुव्यर्वहार गरेको घटना सार्वजनिक भएको थियो । त्यसपछि उनलाई नियन्त्रण गर्न पुगेको प्रहरीमाथि उत्तेजित भीडले आक्रमण गर्दा प्रहरी जवान २६ वर्षीया उर्मिला श्रेष्ठको मृत्यु भएको थियो । उनीविरुद्ध जबरजस्ती करणी उद्योगको कसुरमा जिल्ला अदालतमा मुद्दा दर्ता भएको थियो ।
